Гимн тойрогой һур харбаашадай федерациин юрэнхылэгшэ, МВД-гэй ветеран Цыренжаб Мункожаргаловай үүсхэлээр байгуулагдаһан байна. Цыренжаб Эрдынеевичэй мэдүүлһээр, буряад угсаата арадай эртэ урда сагhаа сахидаг эрын гурбан нааданда гимн заабол байха ушартай. Тиимэһээ энэ үүсхэл бэелүүлхын тула харбаашадһаа дэмжэлтэ абажа, поэтессэ Дугарма Батоболотовада гимнын үгэ зохёохыень хандаһан байна.
Гимн гурбан бадагһаа бүридэнэ. Түрүүшын бадагта һур харбаанай түүхэ ороно, хоёрдохидонь эбэр номо дархалдаг уран дархашуул тухай хэлэгдэнэ, гурбадахидань мэдээжэ һуршадые магтан түүрээһэн үгэнүүд ороо.
Гимн «Харбаашанай магтаал» гээд нэрлэгдээ. Хүгжэмыень - мэдээжэ композитор Бато Бальжинимаев, оранжировкыень Константин Митупов зохёогоо. «ДалиТЭ» театрай гол дуушан Доржи Болотов гимн гүйсэдхэжэ, ниитэ зонтой танилсуулаа.
Саашадаа һур харбалгын мүрысөөнүүдэй нээлгэ ба хаалгада мэргэшүүл гимн дууладаг заншалтай болохонь.
Нордоп БАБУЕВА.
