Россиин Федерациин Федеральна Суглаанай Федерациин Зүблэлэй уласхоорондын хэрэгүүдээр хорооной түрүүлэгшын орлогшо Баир Жамсуев март һарада ажалай хэрэгээр Үбэр Байгалай хизаар ба Агын Буряадай тойрог ерэжэ, арад зонтой, засаг зургаанай түлөөлэгшэдтэй, «Боевое братство» эмхиинхидтэй, ажалай ветерануудтай, залуушуултай уулзалгануудые үнгэргэһэн байна. Тиихэдээ Украинада боложо байһан үйлэ ябадалнууд, мүн нацизм ба зэбсэглэгдэһэн һүрөөтэ байдал усадхаха талаар Россиин Федерациин Зэбсэгтэ хүсэнүүдэй сэрэгэй тусхай операци тухай тодорхойгоор хөөрөө.
Агын тойрогой олондо мэдээсэл тараадаг хэрэгсэлнүүдэй сурбалжалагшадай асуудалнуудта харюусахадаа, Баир Баясхаланович иигэжэ тэмдэглээ бшуу: «Бидэ булта хэсүү саг гаталжа байнабди. Манай гүрэндэ, эрхэтэдтэ хабаатай, үзэгдөөгүй ехэ санкцинүүд хэрэглэгдэнэ. Һаад түбэг татаһан эдэ хэмжээнүүд бүхы гүрэнииемнай, экономикыень һандаргаха гэһэн шэглэлтэй. IT-технологи хэрэглэжэ, мэдээсэлэй дай үүдхэнэ. Россиин сэрэгшэд, тэрэ тоодо Агын тойрогой хүбүүд сэрэгэй тусхай операцида хабаадажа, нацизм һүнөөхэ талаар сэрэгэйнгээ уялга нэрэ хүндэтэйгөөр, шэн зоригтойгоор дүүргэнэ. Энээнииень мартаха ёһогүйбди. Агууехэ Эсэгэ ороноо хамгаалгын дайнай ветерануудай, афган, чечен, сириин үйлэ ябадалнуудта хабаадагшадай дурасхаал сахиһандал, нэрэнүүдынь мүнхэлэгдэхэ.
Энэ сэрэгэй операци һаяын сагта дүүрэхэ гэжэ найдая. Минии харасаар, зэбсэг хуряалга (де-милитаризация) һураггүй урид дүүрэхэ аад, Украинын зэбсэгтэ хүсэнүүд Европын ба Америкын зүгһөө буу зэбсэглэлээр, hомо хэрэгсэлнүүдээр ходо хангагдажа байна. Тиигээгүй һаань, ганса маанадай бэшэ, украинцуудай талаһаашье гээгдэл хохидол нилээдгүй бага байха һэн. Украиные булимтаран эзэмдэхэ гэһэн зорилго табигданагүй. Харин Россиин эрхэ ашаг (интересы), эрхэтэдээ хамгаалхань, гүрэн дэбисхэрээ бүрин бүтэн, бэеэ даанги байлгахань шухала. Ородууд ба украинцууд нэгэ арад шэнгеэр хододоо эбтэй эетэйгээр, хүршэ ёһоной харилсаатай, бандеровецүүдгүйгөөр, ажана тэнюун ажаһууха ёһотой».
Сенатор Б.Б.Жамсуев хүн зонтой уулзахадаа, хатуу шэрүүн санкцинуудай хойшолон бага болгохын тула Федерациин Зүблэлэй талаһаа хэгдэжэ байһан ажалтай, абтаһан хуулинуудтайнь танилсуулаа. Хүндүүлхэй, шухала асуу-далнуудые элирүүлжэ, тэдэниие шиидхэхэ талаар ямар хэмжээндэ шиидхэбэринүүдые абахаар бэ гэжэ хүн зоной һанамжа дурадхалнуудаар һонирхоо бшуу. Хабарай тарилга яагаад үнгэргэхэб, юундэ зарим эдеэ хоол үнэтэй, хомор болоноб, ямар аргаар социальна ехэ программанууд бэелүүлэгдэхэб гэhэн элдэб асуудалнуудта тодоор харюусажа, «орон нютагтамнай эдеэ хоол хүрэхөөр бии, саахар, таряа хилын саана худалдан гаргалга хорюултай болоо, гүрэнэй тусхай байгууламжанууд сэнгүүдэй ургалга шалгаха, сэн ямаршье үндэһэгүйгөөр хэтэрмэ дээшэлүүлһэн хүнүүдтэ хэмжээнүүд абтаха» гэжэ гүрэнэй ажаябуулагша тодорхойлоо.
Баир Баясхалановичай хэлэһээр, сэрэгэй тусхай операциин үедэ Эсэгэ оронойнгоо түлөө ами наһаяа үгэһэн, шархатаһан сэрэгшэдэй гэртэхиндэ онсо анхарал хандуулагдаха, орон нютагтань нэрэнь мүнхэлэгдэхэ юм.
Жалсан ЛУБСАНДАШИЕВ.
