Украинада боложо байһан дайшалхы үйлэнүүдтэ эрэлхэг габьяа харуулһан лейтенант Балдан Цыдыповтэй «Буряад ТВ» теле-субаг видео-холбоогоор хөөрэлдөө. Баатар хүбүүмнай мүнөө Санкт-Петербургда Россиин сэрэгэй-эмнэлгын академидэ аргалуулжа байна.
Балдан Цыдыпов юһэн операци хүүлээд байна.
- Саашадаа үшөө олон операцинуудые хүүлэхэб, бэемни удаахан саг соо тэнхэхэ, - гээд тэрэ хэлэнэ. – Эмнэлгын газарни һайн, дүршэлтэй эмшэд аргална. Хэзээшье, түрэлхидэймни болон социальна сүлжээнүүд соо бэшэжэ байһан танигдаашьегүй зоной дэмжэлтэ туһатай.
Батальонойнгоо засадада ороод байһан аюулта үедэ юун тухай һанаабши, ямар мэдэрэлнүүд түрөөб гэжэ сурбалжалагшын асуухада, иигэжэ харюусаа:
- Юрэл сэрэгшынгээ уялга дүүргээб, яагаад хээ һаамни дээрэб гэжэ бодомжолооб. Аймшагтайл байгаа. Зүгөөр тон бага гээлтэтэйгээр зорилгоёо дүүргээбди.
Балдан гэртэхинтэеэ, нүхэдтэеэ саг үргэлжэ хонходолсожо байна. Социальна сүлжээнүүд соо баатаршалга тухайнь толилолгонуудта «нейтральна хандасатайб, дэмжэһэн дулаахан үгэнүүдтэ баяртайб, эдэ үгэнүүдтнай, маанинуудтнай хүсэ шадал нэмээнэ» гэжэ тэрэ хөөрэбэ.
Хөөрэлдөөнэйнгөө эсэстэ:
- Россида алба хаанаб! Бултанда баяраа мэдүүлнэб, - гэжэ богонихоноор хэлээ.
Агын хүбүүн Балдан Цыдыпов мүнөө 23-тай. Новосибирскын сэрэгэй дээдэ училищи дүүргээд, Буряад орон албанда эльгээгдэһэн. Тацинска 5-дахи аминдаа гвардейскэ танкова бригадын мотострелково взводой командирай зэргэдэ Украинада тусхай дайшалхы ябуулгада албаяа үргэлжэлүүлээ.
Март һарын эсэстэ батальонойнгоо засадада ороод, артиллеридэ болон пулемёдуудта буудуулхадаа, Балдан суг алба хаажа байһан 150 нүхэдөө үхэлһөө абараа гэжэ мүнөө олондо мэдээжэ. Лейтенант контузи абабашье, буудуулһан дайшалхы машинаяа эрьюулжэ шадаад, эгээ түрүүн дайсанда эсэргүүсээ.
Машинынгаа һомоной дууһахада, түргэ мүрөөр шархаяа уяад, БМП-гэй люк нээжэ, шархатаһан хоёр нүхэдөө гаргаа, таһалгаряагүй буудалга доро түрүүшын туһаламжа үзүүлһэн байна. Нэгэниинь удангүй гар дээрэнь наһа барашоо, нүгөөдэтэйнь – нютаг хүбүүнтэеэ байлдаагаа үргэлжэлүүлээ. Буудалдаан соо нүхэрынь алдалан унаа...
Хоёр часай туршада байлдаа. Байлдаанай түрүүшын минутанууд тон шухала байгаа гээд хэлэгдэнэ, иимэ үсэд эсэргүүсэлтэ абахабди гэжэ хүлеэгээгүй дайсаниие һүйдхөөгөө ха юм. Олон тоото шархануудые абажа, мэдээгээ алдаһан Балданиие туһаламжа боложо дүтэлһэн сэрэгшэд байлдаанай газарһаа гаргаа.
Эрэлхэг габьяа харуулһан нютаг хүбүүгээ Россиин Баатарай нэрэ зэргэдэ хүртөөхэ тухай зууршалалга хэжэ, Агын тойрогой арад зон олоороо гараа табяа, сенатор Баир Жамсуев болон Буряад Уласай Толгойлогшо Алексей Цыденов Ород Уласай Юрэнхылэгшэдэ, оронойнгоо хамгаалгын сайдта хандаа.
Дарима БАЗАРОВА.
