Эндэ һая тойрогой Захиргаанай хүтэлбэрилэгшэ Буянто Батомункуевай ударидалга доро барилгын ажалнуудаар зүблөөн үнгэргэгдэһэн байна. Зүблөөндэ подрядчигууд, барилгын объектнүүдые тушаажа абаха эмхинүүдэй түлөөлэгшэд (заказчики) хабаадалсаа.
Байгша ондо тойрогой дэбисхэр дээрэ 65 объект дээрэ барилгын хүдэлмэринүүд ябуулагдахаар түсэблэгдэнэ гэжэ хэлэгдээ. Барилгада гүрэнэй бюджедһээ 1 миллиард 200 сая гаран түхэриг һомологдохо юм.
«Здравоохранение» гэһэн үндэһэн түлэблэлэй шугамаар Агын тойрогой, Могойтын аймагай больницануудай поликлиникэнүүд, Балжанын, Уртын эмнэлгын амбулаторинууд һэльбэн шэнэлэгдэхэ юм. Эмнэлгын эмхинүүд шэнэ авто-унаануудаар хангагдаха.
ЦЭР-эй программа дотор «Забайкальский дворик» түлэблэлэй үндэһөөр Ага, Могойто, Орловск тосхонуудта, Дулдарга һууринда 5 хотон болбосон түхэлтэй болохо юм.
«Культура» үндэһэн түлэб-лэлөөр Сагаан-Уулын, Дулдаргын соёлой байшанууд, Хүнхэрэй хүүгэдэй уран урлалай һургуули, Могойтын номой сан шэнэ түхэлтэй болохо ха.
«Эрдэм һуралсал» гэһэн үндэһэн түлэблэлөөр Тугшанай, Будаланай, Һүдэнтын дунда һургуулинуудта заһабарилгын хүдэлмэринүүд эхилэнхэй.
«Безопасные качественные автомобильные дороги» гэһэн үндэһэн түлэблэлөөр Нуринск һуурин ородог, «Ага-Саһаша» нютагууд хоорондын харгынууд шэнэ асфальтаар хушагдаха.
«Формирование комфортной городской среды» программын хүсөөр Ага тосхондо голой эрье бүхэлэгдэхэ, Алдар Цыденжаповай хүшөө бодхоогдохо, Шэнэ Орловскдо роллердром түхеэрэгдэхэ, Дулдаргада вокзалай талмай, Үзөөндэ бэеэ һорилгын комплекс, Могойтодо хүшөө, Хара-Шэбэртэ сквер, Хилада талмай баригдаха бшуу.
Дээрэ нэрлэгдэһэн объектнүүд сентябриин 1 болотор баригдажа, ашаглалгада тушаагдаха болзортой. Барилга хэжэ ябаһан подрядна эмхинүүд даажа абаһан объектнүүдээ саг соонь шанартайгаар хэжэ тушаахабди гэжэ найдуулаа.
Эрдэни ЧИМИТДОРЖИЕВ.

You have no rights to post comments