Апрелиин 29-һөө майн 1 болотор Ага тосхоной "Баатар" элүүржүүлгын түб соо "ЭБ НАЙРАМДАЛАЙ КУБОК" гэһэн столой теннисээр уласхоорондын нээмэл 22-дохи мүрысөөн болоо.
Мүрысөөндэ Монголһоо, Буряадай Уласһаа болон Үбэр Байгалай хизаарһаа элдэб наһанай, бүхыдөө 150 гаран тамиршад бууһан байна. Тэдэнэй тоодо - Россиин спортын 10 мастер, Монголой спортын 5 мастер, арбаад мастерта кандидадууд.
Хубиин мүрысөөндэ бүһэтэйшүүлэй дунда Улаан-Үдын Евгений Елизаров Илагшын кубок шүүгээ. Хоёрдохи Монгол ороной Ганхуяг Сэр-Од болоһон байна. Эхэнэрнүүдэй хоорондо Шэтын Анастасия Беломестных оройлоо, хоердохи һуурида Орловскын Наталья Чиченева гараа.
Можын мүрысөөндэ бүһэтэйшүүлэй дунда Буряад ороной Silver-Ball (Евгений Елизаров, Алдар Дармаев, Арсалан Тулонов) можо эрхимлээ. Агинское-1 (Дондок Аюров, Батор Дамдинов, Денис Шойжилов) можо хоердохи болоо, 3-дахи һуурида Монгол ба Буряад оронуудые түлөөлһэн Байгал (Чинзориг Тулгуу, Тимур Дашиев, Жаргал Цыбиков) гараа. Эхэнэрнүүдэй хоорондо Забайкалочка (Наталья Чиченева, Анастасия Беломестных, Ирина Капустина түрүүлээ. Удаадахи һууринуудые Гусиноозерск (Ольга Титова, Алтана Ринчинова, Екатерина Яковенко, Яна Вещунова) болон Шэтын Баттерфляй (Ксения Константинова, Елена Коротыгина, Антонина Белозерова) можонууд эзэлээ.
Дарима Базарова.
