Апрелиин 27-до Г.Цыбиковэй нэрэмжэтэ Агын үндэһэтэнэй музей соо Агын Буряадай тойрогто ажаһуудаг Буряад оронһоо гарбалтай зон сугларжа, удха түгэлдэр уулзалга баярай оршон байдалда үнгэргэгдэбэ.
Агын музей соо иимэ уулзалгануудые эмхидхэхэ түлэблэл заншалта болонхой. Тоонто нютагһаа һайхан юун байхаб даа?! Иимэ уулзалгануудта нэгэ нютаг ороной зон сугларжа, бэе бэетэеэ харилсадаг, танилсадаг, нютаг нютагайнгаа һонинуудаар хубаалдадаг гээшэ.
Тус уулзалгада Захааминай, Хяагтын, Түнхэнэй, Зэдын, Сэлэнгын ба Ахын аймагуудта тоонтотой хүнүүд айлшаар буугаа. Хоёрдохи дабхарай фойе соо Буряад оронойхидой үзэсхэлэн дэлгээгдэжэ, һонирхол татаа. Мүн гар урлалай үзэсхэлэндэ Захаамин нютагһаа гарбалтай уран гартан Александр Шагдуровай бүтээһэн һэеы гэрэй эд бараан ба Ахын аймагай Эржена Цыдыповагай буряад хүүхэлдэйнүүд табигдаа.
Нютаг бүхэнэй түлөөлэгшэд тоонтынгоо түүхэтэй, байгаалиин нангин газарнуудтай, мэдээжэ хүнүүдэй намтарнуудтай сугларагшадые танилсуулаа. Жэшээлбэл, Захаамин нютагта тоонтотой уран гартан Александр Шагдуров, РФ-гэй габьяата артист, «Амар сайн» дуу хатарай театрай хүгжэмшэн Леонид Бабалаев гэгшэд нютагайхидаа амаршалжа, хүгжэмтэ бэлэг баряа. Тиин энэл нютагай бэлигтэн - «Амар сайн» театрай хатаршан Алексей Дымбрылов Сэлэнгын аймагта тоонтотой Наталья Дармаеватай суг хамта бүжэг хатаржа хужарлуулаа.
Удаань Хяагтын аймагай Росгвардиин подполковник Александр Очиров тайзан дээрэ гаража, нютаг тухайгаа ехэ һонирхолтойгоор хөөрэһэн байна. Энэл нютагһаа гарбалтай «Амар сайн» театрай хүгжэмшэд Ю.Галданова ба Н.Куренова хоёр ятага дээрэ хүгжэм зэдэлүүлжэ, хүн зониие баясуулаа.
Түнхэнэй аймагта тоонтотой, Шулуутай нютагай ажалай ветеран Валентина Базарова дэлгэрэнгыгээр нютагайхидтаяа танилсуулжа, һонин мэдээ дамжуулаа.
Зэдын аймагай Алцаг һууринай, Агын телерадиокомпаниин мэдээжэ сурбалжалагша, Үбэр Байгалай хизаарай соёлой габьяата хүдэлмэрилэгшэ Людмила Болотова түрэһэн нютаг тухайгаа баримтата фильм дурадхаа. Ахын аймагһаа гарбалтай Агын гимназиин хари хэлэнүүдэй багша Туяна Чимитдоржиева нютагайхидаа амаршалжа, шабинь – 5-дахи ангиин һурагша Тамир Ширапнимбуев гитара дээрэ хүгжэм наадажа дэмжээ бшуу.
Эгээл һонирхолтойнь, сугларагшад нютагайнгаа мэдээжэ хүнүүдэй амаршалга баярлан шагнаба. Мэндэшэлэлгэеэ эльгээгшэд гэбэл, Х.Намсараевай нэрэмжэтэ Буряадай драмын те-атрай зүжэгшэд: Россиин Федерациин арадай артист Людмила Дугарова (Аха), Россиин Федерациин габьяата артист Олег Бабуев (Захаамин), Буряад Уласай арадай артист Надежда Мунконова (Аха), «Байгал» театрай дуушан Сэдэб Банчикова (Түнхэн), энэл театрай хүгжэмшэн, Буряад Уласай арадай артист Лариса Шаралдаева (Зэдэ), эстрадна дуушан Дарима Цырендондопова (Сэлэнгын аймаг) гэгшэд болоно. Уулзалгада сугларһан зоной экран дээрэһээ нютагайхидаа шагнажа, сэдьхэлээ хүдэлгэн, нулимсаа аршажа байхыень харахада, уярмаар байгаал даа.
Ага нютагта үхибүүдэй дунда үнгэргэгдэжэ байһан СССР-эй арадай артист К.И.Базарсадаевай нэрэмжэтэ дуушадай мүрысөөнэй жюриин гэшүүн, Россиин Федерациин габьяата артист, Буряадай гүрэнэй оперо болон баледэй театрай гол дуушан Дамба Занданов уулзалгада хабаадажа, Хяагтын аймагай Алтай һууринһаа гарбалтай нютагайхидаа амаршалаад, дуу хангюурдажа, уулзалгын шэмэг болоо.
Түгэсхэлдэнь сугларагшад Буряад Уласай гимн һүр жабхалантайгаар гүйсэдхэһэн байна.
Шойжит АРСАЛАНОВА,
музейн даргын орлогшо.
