Майн 9-эй бороо хуратай үдэр Ага тосхоной «Олимп» тамирай түбэй газаа хүн зон олоороо сугларжа, Эсэгэ ороноо хамгаалгын дайнда хабаадаһан, ара талада ажал хэһэн түрэлхидэйнгөө дүрэ зурагуудые баряад, «Хэтын жагсаалда» алхалаа.
Агын Буряадай тойрогой тосхон, һуурин бүхэндэ «Хэтын жагсаалда» ажаһуугшад гараа. Жэшээлбэл, «Урда-Ага» хүдөө һууринай багахан Баян-Булаг нютагай зон «Хэтын жагсаалаар» Агуу Илалтын хэмжээ ябуулгануудаа эхилһэн байна.
Баян-Булагай сүлөө сагаа үнгэргэлгын түб соо.
Бүхыдөө энэ үдэр Оросой Холбоото Уласта 12 сая гаран хүн үбгэ эсэгэнэрэйнгээ дүрэ-зурагуудые баринхай, «Хэтын жагсаал» гэһэн акцида хабаадаа гэһэн баримта түбэй олондо мэдээсэдэг хэрэгсэлнүүд тарааба.
«Хэтын жагсаал» анха түрүүшынхеэ 2012 ондо эмхидхэгдэһэн. Арбан жэлэй хугасаа соо олон юумэн хубилаа, зүгөөр дайнай газарта алдалан унаһан болон Агуу Илалта шэрээлсээд, гэртээ амиды мэндэ бусаһан баатарнууд тухай дурасхаал хубилшагүй.
Һүүлэй хэдэн жэлэй туршада энэ хэмжээ ябуулга онлайн маягаар эмхидхэгдэһэн байна. Тиимэһээ Ага тосхоной «Хэтын жагсаалда» хабаадагшад түб талмай хүрэтэр ехэ хүнгэнөөр, сэдьхэлээ доһолонги урматайнууд алхалалдаа бшуу. Үбгэ эсэгынгээ дайшалхы габьяада болон аба эжынэрэйнгээ ара талын ажалай габьяада хүн бүхэн нангинаар хандана гэжэ элеэр харагдаа.
Ага тосхондо.
Мүнөө Украинада боложо байһан тусхай сэрэгэй дайшалхы ябуулга тухай дурсалганууд энэ жэлэй хэмжээ ябуулгын онсо шэнжэнь болоо. Украинадахи дайшалхы ябуулгада хабаадажа ябаһаар баатарай үхэлөөр алдалан унаһан гүлмэр залуухан сэрэгшэдэй дүрэ зурагуудые томо хото городуудай жагсаалда түрэлхидынь абаад ябаһан байна.
Дарима Базарова.
