Үбэр Байгалай хизаарта нарин нооһото хонидой үүлтэр байгуулагшадай нэгэн, РСФСР-эй габьяата зоотехник Базар Цыбиковтэ зорюулагдажа, дурасхаалай самбар нээлгэ майн 10-да Ушарбай нютагта эмхидхэгдээ. Бэлигтэй зоотехник Базар Цыбиковэй түрэһөөр байгша ондо 110 жэл гүйсөө.
«Ушарбай» ажахын баян түүхэдэ нэрэнь алтан үзэгүүдээр бэшэгдэнхэй. Базар Цыбиков Эсэгын дайнай урда жэлнүүдһээ эхилжэ, үүлтэр һайжаруулгын ажал ябуулаа. Һайн нооһотой, шэмэтэй мяхатай хониной үүлтэр байгуулалсаа, энэ хэрэгтэ хамаг хүсэ шадалаа үгэжэ хүдэлһэн юм. Базар Цыбиков Ажалай Улаан Тугай, Ленинэй орденуудаар, «СССР ба РСФСР-эй хүдөө ажахын эрхим» гэһэн энгэрэй тэмдэгээр шагнагдаһан. Ажахын малшад, үрэжүүлэгшэд тэрэнэй байгуулһан нарин нооһото үүлтэрэй хонидой шанар олон жэлдэ дээшэлүүлжэ, тоо толгойень арьбажуулжа ябана гээшэ.
Ушарбай нютагай ажаһуугшад дурасхаалай самбар байгуулха гэжэ үүсхэл гаргаһан байна, Базар Цыбиковэй түрэлхидынь тэрэнииень дэмжээ. Самбар нээлгын үедэ тойрогой Захиргаанай хүтэлбэрилэгшэ Буянто Батомункуев, Россиин габьяата зоотехник, хүдөө ажахын эрдэмүүдэй кандидат, Базар Цыбиковэй хүбүүн Бадмажаб Цыбиков гэгшэд амаршалгын үгэнүүдые хэлээ. Дурасхаалай самбар музейн байшанда тодхогдоо, нарин нооһоор хэһэн зүйлнүүдэй үзэсхэлэн дэлгээгдээ.
Эрдэни ЧИМИТДОРЖИЕВ.
