Августын 21-дэ Агын тойрогто СССР-эй арадай артист, Оросой Уласай Ажалай Баатар, Гүрэнэй Дүүмын депутат ябаһан Иосиф Кобзоной наһанай нүхэр Нелли Кобзон Россиин эстрадын ододтой суг айлшаар бууһан байна.
Холын айлшад нэн түрүүн Агын Буряадай тойрогой Захиргаанай хүтэлбэрилэгшэ Буянто Батомункуевтай уулзажа, Иосиф Давыдовичые дулаанаар дурсаа. «Иосиф Кобзон депутат ябахадаа, Агын Буряадай автономито тойрогой Захиргаанай Толгойлогшо Баир Жамсуевтай суг ажал ябуулжа, тойрогоймнай хүгжэлтэдэ нилээд ехэ хубитаяа оруулһан. Сентябрьда Агын тойрогой байгуулагдаһаар 85 жэл гүйсэхэ. Энэл һарада Иосиф Давыдович мэндэ ябаа һаа, 85 жэлэйнгээ ой угтаха байгаа...» - гэжэ Буянто Балданжапович хэлээ һэн.
Нелли Михайловнатай суг тэрэнэй туһалагша Варвара Виноградова ба И.Д.Кобзоной жасын захирал Антон Собянин гэгшэд ябалсаа. Тэдэнэр И.Кобзоной нэрэмжэтэ Агын хүүгэдэй уран урлалай байшанай хүмүүжэмэлнүүдэй уран бүтээлнүүдтэй ба алдарта дуушанай дурасхаалда зорюулагдаһан «Песни легенды» гэһэн түлэблэлтэй танилсаад, энэ фестивалиин шангай жасада горитойхон мүнгэн туһаламжа оруулаа.
Нелли Кобзон ба бэшэн И.Д.Кобзоной дурасхаалай самбарта ба Агын Баатарнуудай аллейдэ алдарта дуушанай хүшөөдэ баглаа сэсэгүүдые табяа.
Н.Кобзон (зүүн гарһаа) баярай үгэ хэлэнэ.
«Амар сайн» театрай танхим соо И.Кобзоной түрэһөөр 85 жэлэй ой угтуулһан «Мой путь» гэһэн концерт-зорюулгада Анжелика Агурбаш, Игорь Демарин, Ирина Грибулина, Алексей Глызин, Мариам Мерабова, Петр Дранга, «Республика» бүлэг ба Таисия Повалий гэгшэд аялга дуугаа бэлэглэжэ, агынхидые маша ехээр баясуулба.
Жалсан ЛУБСАНДАШИЕВ.
