Бооржын сэрэгэй частьда алба хаадаг сэрэгшэд гурбадахи жэлээ удаа дараалан «АрМИ-2022» гэһэн Уласхоорондын сэрэгэй наадануудай хэмжээндэ үнгэргэгдэһэн «Танкова биатлондо» эрхимүүд болобо.
Августын 27-до үнгэрһэн финалай мүрысөөнһөө сэхэ дамжуулга «Звезда» телеканал ябуулжа, олониие һонирхуулаа, олоной зүрхэ сэдьхэлдэ нютаг хүбүүдэй түлөө омогорхол түрүүлээ.
Экипажай бүридэлдэ танкын командир старшина Дмитрий Бочкарёв, наводчик-оператор ахалагша сержант Олег Орлов ба механик-жолоошон сержант Сандан Санжиев хабаадабад. Тэдэ 24 сагаалсын 23-ыень оноод, өөһэдынгөөл рекорд сохижо, урилдаанай зайе 1 час 29 минута 36 секундын туршада гаталаад, эгээл түрүүн фиништэ ерэһэн байна.
Манай хүбүүдтэй түрүүшын һууриин түлөө Белоруссиин болон Хитадай можонууд тэмсэжэ, тус тустаа 1 час 41 минута 5 секундын ба 1 час 44 минута 3 секундын дүн харуулба. Узбекистанай можо дүрбэдэхи болоо.
Үбэр байгалайхид 2020, 2021 онуудташье илагшад болоһон юм гэжэ һануулая.
Дарима БАЗАРОВА.
