Баирма Ешидоржиевагай зурагууд интернедээр дүүрэн таража, хэдэн мянган лайк суглуулдаг, тиигэжэ олондо мэдээжэ болоһон юм. Тиибэшье Агын тойрогой дэбисхэр дээрэ уран зураашын үзэсхэлэн түрүүшынхеэ эмхидхэгдээ.
Тус хэмжээ ябуулгын эхиндэ Агын Буряадай тойрогой Захиргаанай хүтэлбэрилэгшэ Буянто Батомункуев: «Үзэсхэлэндэ урилгатай болоходоо, заабол бэеэрээ хабаадахаб, үзэсхэлэн харахаб гэжэ өөртөө түсэб табяа һэм. Багсаахада, 2015-2016 онуудай үеэр, Сагаалганай һайндэрэй дүтэлөөд байха үедэ, түрэлхидөө амаршалхаяа интернет соо открытка бэдэржэ байтараа, Баирма Цыденовнагай үндэһэн буряад маягаар зураатай зурагуудтай танилсаа һэм. Һүүлдэнь Украинада тусхай операциин эхилээд байхада, наманшалжа, маани уншажа байһан сэрэгшын зураг минии анхарал бүришье татаа бэлэй. Тэндэ ябаһан нютагай хүбүүдтэй хөөрэлдэдэгби, мүн тиихэдэ апрель соо Үбэр Байгалай хизаарай амбан захирагша Александр Осиповтой болон Шэтын дасанай Бэлигто ламатай хамтаржа, тусхай операцида ябаһан сэрэгшэдтээ ошоо һэмди. Тиихэдээ хүбүүднай иигэжэ хэлэжэ байгаа: «Дайнай газарта ябахадаа, бурхан сахюусандаа зальбаржа, маани мэгзэм уншажа, хүсэ шадалтай, зоригтой болонобди». Бэлигто лама уншалгануудые бүтээгээ, хүбүүдтэ тарни маанитай һахюуһануудые тараагаа. Украинын тусхай операцида эхинһээнь ябаһан Алханын хүбүүн намда иигэжэ хэлээ һэн: «Тусхай операциин эхилһэнһээ хойшо сэрэгшэдэй дайшалхы зориг тиимэшье дээгүүр байгаагүйл даа, харин арад зоной дэмжэжэ, маанадые дүнгэжэ эхилһэнһээнь хойшо урдаа табиһан даабарияа урматайгаар дүүргэдэг болообди». Тиимэһээ маани уншажа байһан сэрэгшын зураг мүнөөнэй сагаар тон удхатай зураг боложо үгөө. Буряад арадайнгаа соёл мүнөөнэй харасаар хүгжөөжэ байһандатнай, би танда ехэ баяртай байнаб», - гэжэ хэлээд, Агын Буряадай тойрогой Захиргаанай зүгһөө баярай бэшэг ба сэнтэй номуудые барюулаа.
Удаань Һүдэнтэ һууринай захиргаанай толгойлогшо Жаргал Дагбаевта үгэ үгтөө. «Буряад арадайнгаа заншал дэлгэрүүлжэ ябаһан уран зураашын харгы уужам, үшөө олон үзэсхэлэнүүдые дэлгээжэл ябагты. Иимэ бэрхэ, урагшаа һанаатай басага үндылгэһэн аба эжыдэнь баярые хүргэнэб», - гээд, тэрэ мүнгэ барюулаа, хони бэлэглээ.
Баирма Ешидоржиевагай түрэлхид, үетэн нүхэдынь, багшанарынь, айлшад уран зураашын талаан бэлигээр урмашан, амаршалгын дулаахан үгэнүүдые зорюулаа. Уран гоёор зураһан зурагуудынь гүнзэгы удхатай. Баирма зурагууд соогоо эхын жаргал, буряад арадай түүхэ, домог, нютаг ороноо гэхэ мэтэшэлэн уран гоёор зуража харуулаа. Сэрэгэй тусхай операцида хабаатай зурагуудынь хаа-хаанагүй мэдээжэ боложо, сэрэгшэдэй дайшалхы замайнь һүр һүлдэ бодхооно гэхэдэ, алдуу болохогүй.
Валентина ЦЫРЕНЖАПОВА.
