«Би – дуушан» гэһэн концертдэ Дашима Цынгуева өөрынгөө зохёоһон дуунуудые дуулажа, олониитэтэй танилсуулаа. Концерт дүрбэн хубиһаа бүридөө. Түрүүшын хубида дуушан түрэл дайда, байгаали тухай дуунуудаа зэдэлүүлээ. Хоёрдохи хуби Дашима Цынгуевагай гэр бүлэдөө – аба эжыдээ, наһанайнгаа нүхэртэ, хоёр хүбүүдтээ, басагандаа зорюулһан дуунуудһаань бүридөө. Гурбадахи хуби мүнөө боложо байһан үйлэ хэрэгтэ хабаатай: хүбүүдэй Украинада сэрэгэй тусхай операцида хабаадажа, Эхэ ороноо аршалжа ябаһан тухай дуунууд зэдэлжэ, олондо һайшаагдаа. Концерт-нааданай һүүлшын дүрбэдэхи хуби «Би – дуушан» гэhэн дуугаар түгэсөө.
Дашима Цынгуева дуунууд соогоо сэдьхэл зүрхөөрөө һанаагаа зободог юрын буряад эхэнэр тухай ба эхын жаргал харуулжа шадана. Дуунуудынь үндэһэн буряад хэлэн дээрэ зэдэлжэ, тэрээгээрээ олондо һайшаалтай, абтасатайшье байба гэжэ ажаглахаар.
Артистын харгы замда гаража, шэнэхэн дуунуудые мүндэлүүлжэ эхилһэн Дашима Цынгуевада Агын Буряадай тойрогой, Дулдаргын аймагай, Ага тосхоной захиргаануудай зүгһөө баярай бэшэгүүд барюулагдаа. Харагшад тайзан дээрэ гаража, бэлигтэй дуушанда дулаахан үгэнүүдые хэлэжэ, баглаа сэсэгүүдые бэлэглэжэл, бэлэглэжэл байгаа һэн.
Валентина ЦЫРЕНЖАПОВА.
