Энэ уулзалгада тойрогой Захиргаанай ажалтад, тойрогой Захиргаанай мэдэлдэ байһан эмхи зургаануудай хүтэлбэрилэгшэд хабаадалсаа.
Баир Баясхаланович һунгалтын асуудал дээрэ тогтоо. «Үнгэрэгшэ һунгалтануудта Агын тойрог засагай намай түлөө дуугаа үгэлгөөр муу бэшэ дүнгүүдые харуулһан, энэнь Үбэр Байгалай хизаарай хуули тогтоолгын зургаанда, гүйсэдхэхы засаг зургаанда тойрог түлөөлхэ арга боломжо үгэнэ. Мүн засагай намай түлөө һайнаар дуугаа үгэлгэ, амбан захирагшые һунгалгада дэмжэлтэ үзүүлгэ хадаа гүрэнэй урда тойрогойнгоо ашаг туһа хамгаалха эрхэ олгоно. Агын тойрог һунгалтын дүн шиидхэхэ аргатай нягтаранги нютаг гэжэ мэдэдэг тула бидэниие шагнадаг, ойлгодог. Теэд һүүлшэг тээ засагай намда дуугаа үгэлгын тоо доошоо ороно. Ямар нэгэн намай түлөө, мүнөө ушарта засагай намай түлөө дуугаа үгэлгэ хадаа Агын тойрог хүгжөөхэ, тойрогой ашаг туһа хамгаалха, элдэб асуудалнуудые шиидхэхэ зэмсэг боложо үгэнэ. Юрын хүндэ һайн харгы, хүүгэдэй сэсэрлигүүдэй, һургуулинуудай заһабарилга, салинай дээшэлэлгэ г.м. шухала. Үнгэргэгдэдэг һайндэрнүүдэй, найр наадануудай тойрогой дэбисхэр дээрэ үнгэргэгдэжэл байхань шухала. Юундэб гэхэдэ, эдэ хэмжээ ябуулганууд ашаг үрэтэй, туһатай. «Алтаргана» наада, һур харбалгаар Россиин чемпионат үнгэргэһэнэймнай ашаар соёлой, тамирай объектнүүд заһабарилагдаа. Энэл даа, һунгалтада хабаадажа, засагай намай, кандидадуудай түлөө дуугаа үгэлгэ гээшэ. Тиимэһээ хүн бүхэн энээниие мэдэрхэ ёһотой. Һунгалтада эдэбхитэйгээр хабаадаха гэхэдээ, һунгалтада миин ерэхэ бэшэ, харин засагай нам дэмжэхэ тухай хэлэнэбди. Энэ хадаа тойрогой саашанхи хүгжэлтэ дэмжэхэ арга бшуу. Мүнгэн һангай талаар шэнжэлэл хэхэ үедэ ганса районно коэффициент болюулха асуудал табигдаагүй. Эндэ Үбэр Байгалай хизаарай Засагай газарай даадаг үүргэ дабтажа байһан Агын тойрогой Захиргаан хэрэгтэй юм гү гэһэн асуудал бодхоогдоо һэн. Хэрэгтэй, юундэб гэхэдэ Агын тойрог тусхай зэргэтэй байхын хажуугаар энэ дэбисхэр дээрэ нэгэдэнги, нягтаранги ажаһуудаг буряадуудай тамирай, соёлой г.м. талаар үндэһэн хүгжэлтэ, заншалта ажахы хүгжөөлгэ хараална гэжэ ехэ оролдолго гаргажа гэршэлһэн байнабди, саашадаашье гэршэлхэ ёһотойбди. Аша үрэтэйгөөр һунгабал, дүрбэн депутадуудтай болохо аргатайбди. Декабрь һарада Россиин Федерациин Юрэнхылэгшын, ерэхэ жэлэй сентябрь һарада Үбэр Байгалай хизаарай амбан захирагша Александр Михайлович Осиповой бүрин этигэмжын болзор дүүрэхэ. Тиимэһээ дахин һунгалтанууд болохо.
Мүнөө үнгэргэгдэхэеэ байһан һунгалтанууд нэгэ бага ондоотой. Сэрэгэй тусхай үйлэ хэрэгэй, манай гүрэндэ хүндэ хүшэр сагай боложо байһые булта мэдэнэбди. Сэрэг дайгаар бидэниие диилэхэ һэдэлгэ хэгдэнэ. Сэрэг дайгаар диилэхэ гэхэдээ, политическэ бүхы системэ һэлгэхэ гэһэн удхатай. Өөрын эрхэ сүлөөтэй, бэеэ даанги Росси гүрэн хэндэш хэрэггүй, тиимэһээ гүрэн унагааха, хэдэн хубида «таһалха» ябуулга, заналта болоно. Тиимэһээ манай гүрэн байха гү, али үгы гэһэн асуудал табигдана. «Юундэ теэд дайн соносхогдоногүйб?» гэжэ һурахат. Нэгэдэхеэр, Россиин гүрэндэмнай эсэргүү, харша һанаатайгаар Украиные тухиржа, Украинада буу зэбсэгээр, мүнгөөр туһалжа байһан зондо хөөрэлдөө хэхэ, эбээрээ хэлсэхэ, сэрэгэй тусхай үйлэ хэрэг тогтоохо арга боломжо үлөөнэбди. Бидэ энэ дай үүсхээ бэшэбди гэжэ булта һайн мэдэжэ байнат. Хоёрдохёор, манай Верховно Главнокомандалагшын, Хамгаалгын яаманай, сэрэгшэ хүбүүдэймнай эрэлхэг зоригой, баатаршалгын ашаар бидэ булта амгалан тайбан байдалда ажаһуунабди. Хэрбэеэ дайнай соносхогдоо һаа, ямаршье һунгалта үнгэргэгдэхэгүй, засагай түлөөлгэтэ зургаанууд ажалаа хуряан тогтоохо болохо, бүхы юумэн дайнһаа дулдыдаха. Бидэнэй һунгалтаар ганса манай аналитигууд, экспертнүүд һонирхоно бэшэ, гадуур талаһаашье саг үргэлжэ анхаралтайгаар адаглажа, шалгажа байна. Хороонойнгоо һүүлшын зүблөөн дээрэ Россиие муутан болгожо бэшэһэн, харуулһан хэды каналнууд интернедтэ бииб гэжэ шэнжэлхэ гуйлтатайгаар экспертнүүдтэ хандаа һэмди. Иимэ каналнууд жорхой һонороор хүдэлдэг гээшэ бэд даа. Жэшээнь, миисгэй, нохой бариха, гахай үдхэхэ, фитнесээр бэе һорихо дуратайшуулай г.м. юрын канал гэжэ һанахада, тэндэ заримдаа түрүүшээр тон үнэниие харуулһан мэдээсэл шэнги аад, үнэндөө Россиин Федерациин Зэбсэгтэ Хүсэнүүдэй, засаг зургаанай нэрэ гутааһан, хүндыень бууруулха гэжэ һэдэһэн, һэжэгтэ оруулхые хүсэһэн, сэрэгэй тусхай үйлэ хэрэгэй зорилгонууд тухайшье худал хуурмаг мэдээн «шэдээтэй» байдаг. Иимэ буруу, худал мэдээнүүдтэй 200 канал бии.
Һунгалтаар һонирхоно, адаглана. Үбэр Байгалай хизаараар албан хэрэгээр ябаан соогоо нэгэ хэды шиидхэгдээгүй асуудалнуудые элирүүлээб. Жэшээнь, харгынууд, илангаяа нютагай удха шанартай харгынууд аягүй муу байдалда оронги. Бороо хура үнгэрөө, грейдернүүд ябанагүй, зониие шэрэдэг унаанууд иимэ харгыгаар ябахаяа арсана г.м. Хүн зон урмаа хухаржа, дураа гутажа, бүхы юумэндэ аймагай толгойлогшоһоо эхилээд, губернатор, Юрэнхылэгшэ хүрэтэр бүхы засагые гэмнэжэ эхилнэ. Шиидхэгдээгүй асуудалнуудай зандаа үлэжэл байгаа һаа, политическэ асуудал болоно, эдэ бүгэдэ адаглагдажа, хадуугдажа, тэмдэглэгдэжэ байна ха юм. Һүүлэй һүүлдэ «үбшэн газарыемнай хүдэлгэжэ», һунгалтын үрэ дүндэ нүлөөлхэ гэжэ һэдэхэ бшуу…» - гээд тэрэ хэлээ. Мүн Баир Жамсуев зайн галаар, Хулһатада баригдаһан һургуулиин ашаглалгаар, нобшо ноохойн, түлеэнэй ба үнэ сэнгэйнь талаар г.м. шиидхэгдээгүй асуудалнууд, сэрэгэй тусхай операци дээрэ тодорхойгоор тогтоо, булта ниитэ зоной нэгэдэлгэ дээрэ хүдэлхэ ёһотойбди, ондоо арга үгы гээд тэмдэглээ.
