Ном соо хэдэн үе дамжуулагдаһан аба эжын һургаал заабаринууд суглуулагдажа ороо юм. Ургажа байһан үхибүүд энэ ном уншажа, саашанхидаа наһан соогоо эдэ заабаринуудые мэдэжэ, хэрэглэжэ ябаха болоно.
Авторай суглуулһан ажалнуудые Ц.Жамцараногой нэрэмжэтэ хизаарай номой сангай мэргэжэлтэд хэблүүлһэн байна. Бүхыдөө 55 нюурһаа бүридэһэн номой даха К.И.Базарсадаевай нэрэмжэтэ хүүгэдэй уран урлалай һургуулиин багша Ирина Цыденовагай зурагаар шэмэглэгдээ.
Цыремжит Жамсарановна наһаараа багша ябаһан намтартай. Тиихэдээ хэдэн жэл соо эдэ заабаринуудые суглуулжа, хэшээлнүүдтээ, элдэб хэмжээ ябуулгануудта ходо хэрэглэдэг байһан.
«Абын һургаал – алтан, эжын һургаал – эрдэни» ном хадаа авторай гурбадахи хэблэлынь болоно. 2022 ондо хоёр номынь хэблэгдэһэн: «Ухаан бодолой угалза» (таабаринууд) болон «Аглаг дайда шэмэглэһэн адуу малнай» (табан хушуун мал тухай).
Оюна ШАГЖАЕВА.
