Тус мүрысөөндэ бүхыдөө залуушуулай 17 болон ветерануудай (40-һөө дээшэ наһанай) 7 можо хабаадаа. Залуушуулай дунда Хара-Шэбэрэй хүбүүд илаба, 2-дохи һуурида – Могойто тосхоной, 3-дахида Агын багшанарай колледжын можонууд гараа.
Наһатайшуулай дунда түрүү һуури ага-хангилайхид эзэлээ, хоёрдохи һуурида – сагаан-шулуутайнхид, гурбадахи һуурида Аргали нютагайхид хүртөө.
Һануулхада, Нимбу Зорик-туевич 1940 ондо, 17 наһатайдаа Тулунай лётно училищиин оюутан болоо. Дайнай эхилхэдэ, артиллериин командирнуудые бэлдэдэг һургуулида 6 һара һураад, лейтенантын нэрэ зэргэтэй боложо, Ленинградска фронтдо мордоо. 3-дахи Прибалтийска, 2-дохи Белорусска фронтнуудта дайлалдажа ябаа. Нимбу Зориктуевич 1943 ондо баатарай үхэлөөр алдалан унаһан. Байлдажа ябахадаа, Эсэгын дайнай гурбан ордендо болон бэшэшье медальнуудта хүртэһэн габьяатай.
Энэ мүрысөөн Ага дээрэ үнгэргэгдэдэг түрүүшын мүрысөөнүүдэй нэгэн болоно. Манай аба Гармын Цыдендоржи ехэ оролдолго гаргажа, тус мүрысөөнэй эхи табиһан, жэл бүри энэ хэмжээ ябуулга эмхидхэдэг байһан. 1991 ондо мүнгэ алтанай хомор сагта абамнай хүрьгэндөө хандажа, мүрысөө үнгэргэһэн. 1993 ондо Монголой Хэнтэйн аймагай болон Эрхүүгэй можын Усть-Орда нютагай тамиршад мүрысөөндэ хабаадахаяа ерэжэ, ехэ гоё наадан болоо һэн. Тэндэ Ага-Хангилаймнай можо түрүү һуури эзэлжэ, нютагайхидаа ехэ баярлуулһан юм. Тиихэдэ 2-дохи һуурида Монголой можо гараа, 3-дахи һуурида – Эрхүүгэй можо.
Саашадаа энэ мүрысөө хоёр жэлэй нэгэ удаа эмхидхэхэ гэһэн шиидхэбэри абтаа.
Энэ мүрысөө үнгэргэлгэдэ Нимбу Ламожаповай түрэлхид, нютагай арад зон ехэ туһа хүргэһэн байна.
Гармын Цыдендоржын Цыденбатор.
