Хэмжээ ябуулгада суг хүдэлһэн ба ханилһан нүхэдынь, түрэлхид, засаг зургаанай дарганар, Агын багшанарай колледжын оюутад хабаадаа.
Тус ном Улаан-Үдын Буряадай эрдэмэй түбтэ 200 хэһэгээр 2023 ондо хэблэгдээ. Түүхын эрдэмүүдэй доктор, Россиин эрдэмүүдэй академиин Сибириин таһагай эрдэмтэ архивые даагша Вера Лыксокова, түүхын эрдэмүүдэй доктор, Россиин эрдэмүүдэй академиин Сибириин таһагай Монголые шудалалгын институдай хүтэлэгшэ хүдэлмэрилэгшэ, түүхын ба этнологиин, социологиин таһагые даагша Ольга Бураева гэгшэд ном дээрэ хүдэлһэн байна. Энэ ном хатуу дахатай, гадартань геройн дүрэ зураг Баатар уулын зунай байгаалиин мандал дээрэ табигданхай. Ном 200 нюурһаа, 7 бүлэгһөө бүридэнэ. Тэдээн соо намтар, ажаябуулга, гэр бүлэ тухайнь суг һураһан, хүдэлһэн, хани нүхэдэйнь болон түрэлхидэйнь дурсалганууд үгтөөтэй. Гадна олондо мэдээсэл тараадаг хэрэгсэлнүүдтэ Гуродарма Цэдашиевичта зорюулагдажа бэшэһэн материалнууд, амаршалгануудшье бии. Мүн 90 фото-зураг, шагналнуудайнь ба амжалтануудайнь буулгабаринууд, Будаланай һургуулиин 8-дахи ангиин һурагша Гуродарма Цэдашиевай буряадаар бэшэһэн «Баяртай, баяртай, Будаланай һургуули» гэһэн найруулга номой хабсаргалта соо ороно. Түгэсхэлэй бүлэг соо материалнуудай авторнууд тухай мэдээсэгдэнэ.
Гуродарма Цэдашиевичай гэр бүлэдэ, түрэлхидтэ ба дүтын зондо энэ ном хэблүүлхэ хэрэгтэ хабаадаһанайнь түлөө онсо баярые хүргэхөөр. Ном һонирхолтой, удхатай болоо.
Энэ хэблэл Агын Буряадай автономито тойрогой түүхээр һонирходог, Гуродарма Цэдашиевичые мэдэхэ, суг хүдэлһэн зондо зорюулагдана.
(Үргэлжэлэлынь 48-дахи дугаарта уншахада болохо).
Нордоп БАБУЕВА.
