Базар Дугаржапов зүблөөнэй эхиндэ тойрог дотор боложо байһан үйлэ хэрэгүүдтэй танилсуулаа. Дулаасуулгын хаһа, ниитын малай үбэлжэлгэ г.м. кампанинууд түлэг дундаа ябана. Муниципальна байгуулалтануудта хоёр долоон хоногто хүрэхэ шулуун нүүрһэн бии, малай үбэлжэлгэ бараг хэмжээндэ үнгэрнэ.
«Защитники Отечества» гэһэн сэрэгэй тусхай үйлэ хэрэгтэ хабаадаһан эрхэтэдые дэмжэхэ гүрэнэй хизаарай филиалай хүтэлбэрилэгшэ Татьяна Лоншакова түрүүшын асуудалаар элидхэл хээ. СВО-до ябаһан сэрэгшэдтэ алишье талаар дэмжэлтэ үзүүлхэ хүдэлмэринүүд хаа-хаанагүй ябуулагдана. Шэтын филиалай байгуулагдаһаар, хизаарай 4225 ветеранууд элдэб асуудалтайгаар жасада хандаһан байна. Аймаг бүхэндэ социальна координаторнууд бии, тэдэ ажаһууһан газартаа сэрэгшэдтэ ба түрэлхидтэнь зүбшэлгын талаар туһална. Агын тойрогой ажаһуугшад сэрэгэй тусхай үйлэ хэрэгэй эхилһэн түрүүшын үдэрһөө нютагайнгаа сэрэгшэдые дэмжэжэ, горитойхон хубитаяа оруулна. Тодорхойлходо, 32 авто-унаа заһабарилжа, 300 гаран сэрэгэй хэрэгсэл эльгээгээ. Дүн хамта 56 сая гаран түхэригэй юумэ абаһан байна.
Эрдэни ЧИМИТДОРЖИЕВ.
