Соёлой, эмнэлгын гэхэ мэтэ талаар элидхэлнүүд хэгдээ
Агын дуу хатарай «Амар сайн» театр соо болоһон «Социальна һалбари» секцидэ Агын Буряадай тойрогой Захиргаанай хүтэлбэрилэгшын орлогшо Билигма Будаева социальна һалбариин хүтэлбэриин хэһэн ажаябуулга тухай тодорхойгоор элидхээ. «Образование», «Демография», «Здравоохранение», «Культура» г.м. үндэһэн түлэблэлнүүд бэелүүлэгдэжэ, ажабайдал һайжарна, нютагууд хүгжэнэ. Һуралсалай, эмнэлгын, ажаһуугшадые социальна талаар хангалтын, соёлой, тамирайшье һалбаринуудай үрэ дүнтэйгөөр жэлээ хааһыень тэмдэглээ. Мүн дүнгүүдээрнь «Социальная сфера Агинского Бурятского округа в 2023 году: цифры, факты и перспективы» гэһэн хэблэлэй гараһан тухай мэдүүлээ. Тус хэблэл олон таблицаһаа бүридэнэ. Жэшээнь, «Динамика численности обучающихся в ОО с 2017 по 2023 год» гэһэн таблица һонирхолтой. 2017 ондо Агын аймагай һургуулинуудта 2133 хүүгэд һуража байһан һаа, жэлһээ жэлдэ нэмэһээр, 2020 ондо 2246 һурагшад болоод байгаа. 2021 онһоо хүүгэдэй тоо үсөөржэ эхилнэ: 2023 ондо тоонь 2079 болотор унаа. Мүн 1-дэхи ангида ороһон хүүгэдэй тоо үгтэнэ. Таблицаар харахада, жэл бүхэндэ Агын аймагай һургуулинуудта 1-дэхи ангида ерэдэг һурагшадай тоо үсөөн боложол байна. Жэшээлбэл, 2017 ондо 291 хүүгэд һургуулиин богоһо алхаһан һаа, 2023 ондо оройдоол 167 һурагшад һургуулида ороо.
(Үргэлжэлэлынь 5-дахи дугаарта уншахада болохо).
Валентина ЦЫРЕНЖАПОВА.
