Үнгэрэгшэ һарын 27-до Дулдарга һууринай соёлой байшан соо “Балжан хатан” кино харагшадта дурадхагдаа.
Фильм харалгын урда тээ Агын дасанай лама санаартан Ногоон, Сагаан Дара эхэнүүдэй уншалгануудые бүтээжэ, зониие арюудхаа.
Удаань 2010 ондо “Алтаргана” нааданда зорюулагдажа буулгагдаһан “Балжан хатан” фильм дурадхагдаа. Тус фильмдэ Агын “Амар сайн” театрай балетмейстер Жанна Дамдинова Балжан хатанай гол дүрэ, Зүдхэли, Табтаанай, Балжана, Алхана, Тугшан, Шандали г.м. нютагуудай һайн дуранай 100-аад зон хабаадаһан байна, һарын туршада буулгагдаһан 55 минутын фильмын автор – Агын телевидениин сэтгүүлшэн Хандажаб Будаева. Тэрэ “Сценари бэшэлгэдэ мэдээжэ режиссёр Долгорма Долгоржапова туһалһан” гээд тэмдэглээ һэн.
Удаань “Амар Сайн” дуу ба хатарай театрай артистнар концерт-наадаяа харагшадта бэлэглээ. Мүн Гүнэйн “Алтан булаг” аман зохёолой бүлгэм хабаадаа.
Дэлгэрэнгыгээр 19-дэхи дугаарта.
