Мүнөө болоhон мүрысөөн тэбхэр ойнуудтань тудаа: Дашинима 95-тай, Сага-Даба 87-той, Ким 85-тай, Анатолий одхон дүү 75-тай болохо байгаа. Тэрээнһээ гадна 50 жэлэй туршада гэр бүлын можо эдэбхитэйгээр, олон жэлдэ дээгүүр шагналнуудта хүртэн, элдэб хэмжээнэй мүрысөөнүүдтэ хабаадажа ябадаг юм.
Манай хүгшэн аба дайнай hүүлээр 1945 ондо албаяа дүүргэжэ, гэртээ бусахадаа, ехэ хүбүүн Дашинимадаа шатар бэлэг асаржа, шатарай дүримдэ һургаһан. Хүгшэн аба урин шарайтай, хошон зугаа үгэтэй, нюдөөрөө энеэбхилээд, зорёолхон гасаалаад абаха дуратай байhан. Хэшээлhээ ерэхэдэ, шатараа дэлгээд, наадая гэжэ бэлэн хүлеэжэ байгша hэн. Олон ашанараа шатарта дуратай болгоhон. Шатарай мүрысөөндэ Ким ахай үндэр наhатай абаяа дахуулдаг байhан. 1978 ондо Зүдхэлидэ болоhон тойрогой мүрысөөндэ Урда-Агын түлөө Дугаровуудай бүлын можо наадаһан, түрүүшынхеэ Дашинимын Туяна басаган хабаадаад, «Эгээл залуу шатаршан» гэhэн янзада хүртэһэн. 1979 ондо Шандалида Ж.Балданжабоной нэрэмжэтэ турнирай болоходо, бүлөөрөө 3-дахи hуури эзэлээ бэлэйбди. Саашадаа Ким ахайн басаган Саяна, Сага-Даба ахайн Оюна, Дашинимын аша басаган Цыцык, Анатолиин басаган Жаргалмаа шатар наадаhан. Мүнөө тэдэнэй хүүгэд бэрхэ шатаршадай тоодо ороод ябана. Бүлын можо бии болгоё гэжэ Ким ахайн hанамжа байhан.
(Үргэлжэлэлынь 8-дахи дугаарта уншахада болохо).
Туяна ДАШИЦЫРЕНОВА,
Дорьгимын Дугарай аша басаган.
