Гүнэй нютагайхид Агуу Илалтын 72-дохи хабар угтуулан, «Бессмертный полк» акцида эдэбхитэйгээр хабаадаба.
Үглөөнэй 11 сагhаа дайнда ябаhан абанарайнгаа, аха захатанай дүрэ-зурагуудые бариhан хабаадагшад hургуулиин талмай дээрэ сугларжа, жагсаалда алхалаа. Эсэгэ ороноо хамгаалгын дайнда унаhан ба хабаадаhан баатарнуудта зорюулhан хүшөөгэй дэргэдэ ерэжэ, мүнхэ дурасхаалай гүрлөө сэсэг ерээдүй сэрэгшэд табиба. Удангүй Эсэгын дайнай ветеран Нима Жамсаранович Дугаржаповта ба дайнай ара талын ажалда ябаhан наhатайшуулда зорюулагдаhан Илалтын hайндэрэй жагсаал Соёлой байшанай дэргэдэ эхилээ. Һургуулиин ахалагша ангиинхид жэбжэгэр, ягдагар алхадалаар жагсаалай эхи татажа, hайндэрые шэмэглэбэ. Мүн баhа «Алтан Булаг» гэhэн аман зохёолой бүлгэмэй гэшүүд жагсаалда тон эдэбхитэйгээр хабаадажа, олоной анхарал татаа. Багашуулай «Улаалзай» сэсэрлигэй ажалтад солдадай кашаар, халуун сайгаар наhатайшуулые, сугларагшадые хүндэлөө. Нютагай захиргаан, мүн hайндэрые тэдхэгшэ Виктор Ховалыковичай гэр бүлэ хүндэтэ ветерануудта үнэтэ гарай бэлэгүүдые барюулаа. Шэхэнэй шэмэг, нюдэнэй хужар болгон, соёлой байшанай ажалтад, «Алтан Булаг» бүлгэмэйхид ба эдэбхитэд хатар наада, дуу шүлэг бэлэглээ. Халуухан сайгаар, амтан зөөлэн эдеэгээр ахай абгайнараа хүндэлэн хүхеэгээбди. Түгэсхэлдэнь дайнай ветеран М.Старицынай мүнхэ дурасхаалда зорюулагдаhан велосипедээр заншалта болоhон урилдаан үнгэргэгдөө.
Дэлгэрэнгыгээр 19-дэхи дугаарта.
