Арам лама иимэ дээдэ тушаалтай болоходоо, хахад жэл тэндэ ажалаа ябуулдаг болоһон. Сагаалганай хуралнуудые бүтээгээд, ниитын ажал хэжэ байһанаа, Агынгаа дасан ерээд байна.
Алтай Уласта тус эмхитэй хамта шажанай 5 эмхи хүдэлдэг, 10-аад ламанар алба хэнэ, мүн буддын шажанай бүлгэмдэ эдэбхитэй хабаададаг зон бии.
Арам лама иигэжэ хөөрэнэ: «Алтайда шажанай хэрэгүүдһээ гадна ниитын ажал ехэ: улас дотор, Росси гүрэндөө ниитэ бүхы хэмжээ ябуулгануудта хабаадажа, һанамжануудаараа хубаалдажа ябадагбди. Маанадта эсэргүүсэгшэдэй, тэдэнэй тоодо элдэб сектэнүүдэй дурагүйлхөөшье һаань, бүхы тээ хабаадажа ябадагбди, ябахашьебди. Бидэ Росси гүрэндэ албанай ёһоор бүридхэлдэ ороһон, гүрэнөөр дэмжэгдэдэг эмхи болонобди, баримталһан үзэлөө, өөрынгөө хараса хэлэхэ эрхэтэй, хамгаалхашьебди гэжэ ходо хэлэдэгбди. Өөһэдыгөө ходо мэдүүлжэ, эрхимээр хүдэлжэ байха хэрэгтэй.
Агын Буддын шажанай академи дүүргэһэн, Агада 15 жэлэй туршада алба хэһэн Валентин Бордомолов Алтай Уласай Ниитэ Палатада хоёрдохи болзороо хүдэлжэ байна. Тэрэ баһал ниитэ хэмжээ ябуулгануудта хабаададаг.
Жэл бүри дасан ябадаг алтай яһатанай зон олон боложол байна. Ажабайдалай элдэб ушарнуудта ороһон зон ерэдэг: зурхай харуулхаяа, сэржэм үргүүлхэеэ, мэнгэ заһуулхаяа гэхэ мэтэ.
Нордоп БАБУЕВА.
