Үнгэрэгшэ жэл Улаан-Үдын меценат Лев Бардамов Гомбожаб Цыбиковэй Урда-Агада байһан гэрыень задалжа абаашаһан байна.
   Меценат «Галерея Льва Бардамова» гэһэн өөрын музейтэй. Музейн дэбисхэр хэмжүүрээрээ томо, үргэн, тиимэһээ эрдэмтэн Гомбожаб Цыбиковэй гэр Буряадай композитор Бау Ямпиловай, Советскэ Союзай Баатар, генерал-майор Илья Балдыновай, Буряад АССР-эй Министрнүүдэй зүблэлэй түрүүлэгшэ, эрдэмтэн Василий Филипповэй, поэт Даши Дамбаевай гэрнүүдтэй зэргэлээд бодхоогдоо. Гэр соонь Гомбожаб Цыбиковэй мэндэ ябахадаа абаад ябаһан номууд, түрэлхидэйнь фото-зурагууд болон бэшэшье хэрэгсэлнүүд дэлгээгдэһэн байна. Гэрэйнь урда талада эрдэмтэнэй бюст, субарга ба һэеы гэр зохёогдонхой.
   Эрдэмтэнэй аша хүбүүн Бабжа Дондокринчинов, Россиин Федерациин ниитэ һуралсалай хүндэтэ хүдэлмэрилэгшэ Аюр Анандаев, Буряад Уласай соёлой габьяата хүдэлмэрилэгшэ Радна-Нима Базаров, Гомбожаб Цыбиковэй нэрэмжэтэ үндэһэтэнэй музейн захиралай орлогшо Шойжит Арсаланова, Урда-Агын музейн методист Любовь Найданова, Улаан-Үдэдэ Урда-Агын землячествын түрүүлэгшын орлогшо Соёлма Дугарова гэгшэд нээлгын баяр ёһололдо хабаадаа.
   Лев Бардамов буряад арадай уута баялигай түлөө оролдодог, мэдээжэ зоной гэр болон хэрэгсэлнүүдыень наринаар хадагалдаг, өөрынгөө музейн дэбисхэртэ бодхоодог заншалтай.
   Валентина ЦЫРЕНЖАПОВА.

You have no rights to post comments