Майн 6-да Могойтын аймагай Үрѳѳнэй нютагта Агуу Илалта үргэнѳѳр тэмдэглэгдэбэ.
Энэ нютагһаа Эсэгын дайнда 75 хүн ошоhон, тэдэнэй 50-иинь нютагаа бусаhан намтартай, 25-иинь дайнай газарта алдалан унаһан. Тэдээндэ болон 1927-1938 онуудта хамалганда ороһон нютагай 99 хүндэ зорюулhан хүшѳѳ 2015 ондо бодхоогдоһон юм. Энэ хүшѳѳ арад зоной хүсѳѳр лэ бүтээгдэhэн барилга болоно. Иимэ хүшѳѳ бодхооходоо, Үрѳѳнэй нютагай зон жэл бүри митинг хэжэ, ами наhаяа хайрлангүй дайлалдажа, Илалта шэрээһэн зон тухайгаа залуушулдаа шадаха аргаараа хѳѳрэхэ, ойлгуулха зорилго табиһан байна.
Үрѳѳнэйн хүшѳѳ.
Мүнѳѳ жэл митингын һүүлээр hургуулиин хүбүүд, басагад жагсаалда ябаа, дуушан Доржи Бадянов «Русские берёзы» дуу дуулаа, солдадай кашада бүхы зон хүртѳѳ бшуу. Дайнда хабаадагшадайнгаа дурасхаалда зорюулжа, түрүүшынхеэ hур харбалга эмхидхэгдээ. Энэ мүрысѳѳндэ 44 һуршад хабаадажа, стартова кругта эрэшүүлэй дунда 60 наhан хүрэтэр Болот Ринчинов (Ага-Хангил), 60-hаа дээшэ наһанай һуршад соо Балданжап Жаргалов (Могойто), эхэнэрнүүдэй дунда Дарижаб Баясхаланова (Амидхааша) түрүү һууринуудые эзэлээ. Мүрысѳѳнэй абарга элирүүлгын шатада Амгалан Дармаев (Цокто-Хангил), Насан Намсараев (Урда-Ага), Бутит Ринчинова (Ага-Хангил) эрхимлээ. Абаргануудта нэгэ-нэгэ хонин шан, бүхыдѳѳ шангай жасада 24 мянган түхэриг байгаа. Энэ мүрысѳѳн жэл бүри эмхидхэгдэхээр хараалагдаба.
Дэлгэрэнгыгээр 20-дохи дугаарта.
