К.И.Базарсадаевай нэрэмжэтэ Агын искусствын һургуули соо Экологиин жэлдэ зорюулагдаһан хэмжээ ябуулга Һүдэнтэ нютагайхид эмхидхээ.
Ага тосхон дээрэ ажаһуудаг 70 гаран һүдэнтынхид нютагайхидайнгаа бэлдэһэн фото-зурагай болон номой үзэсхэлэнтэй, нютагтань ургадаг ургамал жэмэсүүдтэй танилсаа. Һүдэнтэ нютаг, нютагай мэдээжэ зон, байгаали, ургамалнууд тушаа хэдэн үе сагта олон номууд, брошюранууд хэблэгдэжэ гараһан юм. Номой жасые олон жэлдэ дүй дүршэлтэй библиотекарь Баирма Дамбадугарова баян болгожо, наринаар хадагалжа ябадаг байна. Нютагай дэбисхэр дээрэ нангин шүтөөнэй Буламай, Добжорой мунханууд, үргэлтэй мүргэлтэй Хараа Толгой, Шулуутай хаданууд, эм домтой Һүдэнтын аршаан, “Судунтуйская писаница” байгаалиин хүшөө г.м. алдарта газарнууд олон.
Ой соо ба талада олон янзын, хүнэй бэе махабадта туһатай ургамалнууд, жэмэсүүд ургадаг шуу. Тэрэ тоодо голой хажууда ургадаг һүдэн ургамал онсо удха шанартай. Һүдэнтын дунда һургуулиин һурагшад концерт-наада табижа, хэмжээ ябуулгые шэмэглэһэн байна. Һүүлэй жэлнүүдтэ һургуули дүүргэгшэд, нютагһаа гадуур ажаһуудаг һүдэнтынхид мүнгэ татажа, тоонтоёо һэргээхэ, өөдэнь татаха ехэ ажал ябуулдаг болонхой. Нютагай захиргаанай толгойлогшо Батор Балдановай хэлэһээр, нобшо хаядаг газараа гуримшуулха ехэ ажал бии. Тиин 1974 ондо һургуули дүүргэгшэд эгээл түрүүн мүнгэ суглуулжа, нютагаа һэргээлгын жасада үргэһэн байна.
Дэлгэрэнгыгээр 20-дохи дугаарта.
