Майн 13-да Сахюурта нютагай соёлой байшан соо «Сахюурта ба сахюуртынхид» гэhэн номтой танилсуулгада нютагай зон олоороо суглараа.
Түрүүлэн энэ номой проектын автор Валерий Цыцыков үгэ абахадаа, ном дээрэ хүдэлhэн, материалнуудые суглуулhан хүнүүдтэ баяр баясхалан хүргөө. Удаань энэ ном эблүүлэн суглуулhан нютагай дунда hургуулиин музейн ажалтан, буряад хэлэнэй багша Билигма Болотова номой үргэлжэлэл ерэхэ жэлдэ хэблүүлхэ түсэбтэеэ танилсуулаа. «Сахюурта» агрокооперативай түрүүлэгшэ Алдар Жигмитов Билигма Болотовада бурун бэлэг нэрлээ. Мүн ном дээрэ хүдэлhэн hургуулиин hурагшад гарай бэлэгүүдээр урмашуулагдаа. Сугларагшад нютагай hургуулиин үхибүүдэй концерт- наада хаража хужарлаа. Уран шүлэгшэ Дугарма Батоболотова «Нүхэртөө, шамдаа» гэhэн шүлэгөө уншаа, Сэсэг Лхамаеватай зохёоhон «Мүнхэ дуран» дуугаа түрүүшынхеэ хүн зондо бэлэг болгон дуулаа юм. Нютагай басаган Саяна Лхамацыренова «Найман тахил» хубсаhанай коллекциеэ олондо харуулба.
Дэлгэрэнгыгээр 20-дохи дугаарта.
