Шулуутай нютагай Жамсаран Батомункуев ба Цыцык Бадмацыренова хоёрой гэр бүлэ болоһоор, тэбхэр 60 жэл үнгэрөө. Жаран жэлэй хугасаада алтан дэлхэй дээрэ амар амгалан, эбтэй эетэй ажаһуужа, табан хүүгэдые хүмүүжүүлжэ, ажабайдалай үргэн замда гаргаһан. Мүнөө 12 аша зээнэртэй, 15 гушанартай.
   Дайнай үеын хүүгэд ябахаһаа ажабайдалай бэрхэшээлтэ замуудые гаталһан. Жамсаран аха долоодохи ангиин һүүлээр Д.Дылгыровэй нэрэмжэтэ түрэл ажахыдаа хүдэлжэ эхилһэн намтартай. Совет армиин сэрэгэй алба Владивосток хотодо гараад, нютагтаа жолоошоноор хүдэлһэн, нүхэртэеэ малда ябаһан. Наһанай амаралтада гаратараа, фермерскэ ажахы ябуулһан. Тэрэ социалис мүрысөөнүүдэй хэдэн удаа илагша, 9-дэхи, 10-дахи табан жэлнүүдэй ударник боложо, баярай бэшэгүүдээр, грамотануудаар шагнагдаһан габьяатай.
Цыцык Бадмацыренова Агын 1-дэхи һургуулида 8-дахи анги дүүргэһэнэй һүүлээр Дылгыровэй нэрэмжэтэ ажахыда ажаллажа эхилһэн намтартай. Бага наһанһаа тамирта дуратай, уран һайханай гимнастикаар һонирходог һэн. Эхиртэеэ хоюулаа наһатай болотороо, акробатикаар бэеэ һоридог байһан. Бүхэсоюзна уран һайханай хүдөө ажахын ажалшадай фестивальда нэгэдэхи шатын лауреат болоһон гээшэ.
   Владимир Карелин ба Прасковья Гаврилова хоёрой сугтаа ажаһууһаарнь 55 жэл болоо. Гэрэй эзэн Бооржын аймагай Хара нуур нютагта түрэһэн. Тэрэ 14-тэйдөө Хара нуурай барилгын хүтэлбэридэ ажаллажа эхилһэн. Уссурийск хотодо агаарай-десантна сэрэгтэ албан гараа. Һүүлээрнь Петровск-Забайкальскын аймагай Малета һууринда ажаһуужа байһан гэртэхиндээ ошоһон.
   Прасковья нүхэрынь Улаан-Сүхын аймагай Урлук һууринда түрэһэн. 1968 ондо Шэтын кооперативна техникум дүүргэжэ, Малета һууринда ажаллажа эхилээ һэн. Тэндэ нүхэртэеэ танилсажа, 1970 ондо гэр бүлэ болоо. Тэндэһээ Шэнэ Орловск тосхон зөөжэ ерээд, Владимир ГОК-то трактористаар, бульдозеристээр, механигаар, слесарь-электригээр, ахалагша энергетигээр ажаллаһан намтартай. 2022 ондо 78-тай ябахадаа, ажалһаа болиһон юм. «Ажалай ветеран», «Дайнай үеын хүүгэд» нэрэ зэргэдэ хүртэһэн. Прасковья Фёдоровна Орловскын барилгын хүтэлбэридэ складуудые даагшаар 28 жэл хүдэлөө. Тэрэ 1986 ондо «За трудовую доблесть» медаляар шагнагдаһан.

You have no rights to post comments