Анхан совет засагай үедэ нооһо хиргалгаар мүрысөөн эмхидхэгдэдэг байһан. Гүрэнэй һандархада, иимэ мүрысөөн үнгэргэгдэхэеэ болёод байгаа. «Зунай наадан-2025» һайндэрэй хэмжээндэ Агада хониной «сагаан алта абалгын» фестиваль хоёрдохёо эмхидхэгдээ.
   Тус фестиваль нооһо хиргалгын ажалай үүргэ дээшэнь үргэнэ, элинсэг хулинсагуудаймнай ёһо заншал һэргээнэ, нютагтаа нооһо үйлэдбэри хүгжөөнэ, аяншалагшадые олоор ерүүлнэ гээшэ. Тойрогой Захиргаан, «Руно» эмхиин хүтэлбэрилэгшэ Бадмажаб Батоев, олзын хэрэг эрхилэгшэ Эржена Хан гэгшэд тус фестиваль эмхидхэһэн байна.
Хүндэтэ айлшадай дунда сенатор Баир Жамсуев хабаадаа. Һайндэрэй эхиндэ 1960-1970 гаран онуудта хайшашадай Бүхэсоюзна мүрысөөндэ амжалта туйлаһан ажалай ветерануудта бэлэгүүд барюулагдаа. Дылык Ширапов 1975 ондо РСФСР-эй үйлэдбэриин ученическэ бригадануудай хоорондо эмхидхэгдэһэн мүрысөөндэ илагша болоһон, медаль ба энгэрэй тэмдэгүүдээр шагнагдаһан. Александра Цымпилова 1975 ондо Оренбург хотодо үнгэргэгдэһэн Бүхэсоюзна мүрысөөндэ 2-дохи һуури эзэлһэн юм. Валентина Болотова – СССР-эй ВДНХ-гай мүрысөөндэ хүрэл медальда хүртэгшэ. Тэрэ 1973 ондо нооһо хиргалгаар СССР-эй эрхим нооһо хиргагшадай нэгэн ябаһан. Сэсэгма Базарова 1979 ондо Шэтын можын абарга болоһон габьяатай.
   Хайшашадай хоорондо мүрысөөн үнгэргэгдэжэ, олоной һонирхол татаа һэн. Агын, Могойтын, Дулдаргын, Шэтын, Ононой аймагуудһаа 2-2 хабаадагшад байгаа. Тойрогой Захиргаанай АПК-гай таһагай мал ажалай талаар гол мэргэжэлтэн Николай Цыремпилов нооһо хиргагшадые ударидажа, мастер-класс харуулаа. Нооһо хиргахадаа, оренбургска аргаар ба нютагайхяар хайшалдаг. Оренбургска аргаар хайшалхадаа, хони ууса дээрэнь һуулгаад, толгой, хүзүүнһээнь эхилдэг гуримтай. Манайхяар хони хэбтүүлжэ, гэдэһэнһээнь, хүлһөөнь эхилдэг гээшэ. Шэрүүн нооһондо хайша муугаар, харин нарин нооһондо һайнаар ябадаг тухайнь хабаадагшад тэмдэглээ. Зайн галаар хүдэлдэг хайшануудһаа нэгэшье үлэнгүй, адхуур хайшаар хони хайшалжархина. Энэ аргаар үмсынхид мүнөө болотор хонидоо хайшалдаг.
   Эрэшүүлэй мүрысөөндэ Ага-Хангилай Баир Дамдинов түрүү һуурида гараһан байна. Ононой тойрогой Иван Иринчинов, Ага тосхоной Бабудоржи Бабужапов удаадахи һууринуудта гаража, шангуудта хүртөө. Эхэнэрнүүдһээ Орловскын Дулма Бабужапова эрхимлээ. Удаадахи һууринуудта Зүдхэлиин Светлана Батожаргалова, Ононой тойрогой Хулһата һууринай Валентина Паламова гэгшэд гараа. Фестивалиин үедэ «Руно» эмхидэ хониной нооһоор үйлэдбэрилжэ, ямар зүйлнүүд хэгдэдэг бэ гэжэ зондо харуулагдаа. Нооһоор нэхэһэн хубсаһан, эд бараанай болон сувенирнэ бүтээлнүүд үзэсхэлэндэ дэлгээгдээ.

You have no rights to post comments