Тус хэмжээ ябуулгын нээлгэ Yбэр Байгалай хизаарай филармони соо болоо. Тэндэ 6 бүлэнэрые, тэдэнэй тоодо Могойтын аймагай сэрэгэй тусхай үйлэ хэрэгтэ хабаадагша Доржи Цыреннамдаковой гэр бүлые хүндэлэн ёһолһон байна.
   Форумой хэмжээндэ элдэб талмайнууд ба «түхэреэн шэрээнүүд» эмхидхэгдээ. Ленинэй талмай дээрэ «Семья крепка» гэһэн гэр бүлын фестиваль болоо. Тэндэ айлшадай этнокультурна таһалга (гостиная) Агын Буряадай тойрогой түлөөлэгшэд эмхидх᠋ээ, тиихэдэ шатарта дуратайшуул уласхоорондын гроссмейстер Яна Жаповатай шатар наадаhан байна.
   Дулдаргын аймагай Зүдхэли нютагай уран гартан Дарима Жалсановагай эмхидхэhэн «Волшебная шерсть» гэhэн мастер-классай үедэ дэлhээр, хониной нооhоор hэеы даралга хабаадагшадай анхарал татаа. Энэ форум зоной урма бодхоогоо, һайхан мэдэрэл түрүүлээ, хабаадагшадай ажалнууд дурасхаалта гарай бэлэгүүд болоо бшуу.
   Форумой үшөө нэгэ зохёохы талмайе Дулдаргын аймагай Табтаанай hууринай олон хүүгэдтэй Дамдин ба Должин Эрдынеевтэнэй бүлэ хүтэлөө. Гэр бүлын эзэн ташуур гүрэлгөөр, нүхэрынь сувенирнүүд дээрэ уранаар зуралгаар мастер-классуудые харуулаа. Хүүгэдынь аба эжыдээ туhалаа, пластилинээр яажа юумэ бүтээхэб, зурахаб гэжэ харуулhан байна.
   Айлшадай этнокультурна таһалгада үшөө хэдэн талмайнууд хүдэлөө. Хуушан монгол бэшэгээр мастер-класс Сэсэгма Жанчипова ба Цырена Болотова эмхидхээ. Агын эмнэлгын колледжын багша Ирина Санданова сай ууха гуримтай танилсуулаа.
   Уран гартан Чимитцырен Батодалаева буряад арадай заншалта хубсаhанай суглуулбари дурадхаа, малгай эсхэлгын мастер-класс харуулhан байна. Леонид Бабалаев морин хуураар наадаха мастер-класс үнгэргөө. Агын үндэhэтэнэй музейн ажалтад шагай ба баргай наадануудай талмай эмхидхэhэн байна.
   Форумой хаалгын баяр ёhололдо хизаарай амбан захирагшын орлогшо Аягма Ванчикова бүхы хабаадагшадта баярые хүргөөд, олон хүүгэдтэй айлнуудта шагналнуудые барюулаа. «Родительская доблесть» гэhэн 1-дэхи шатын медаляар Могойто тосхоной арбан хүүгэдтэй эсэгэ Виктор Корнилаев шагнагдаа, 2-дохи шатын медальда Ага тосхоной 8 хүүгэдтэй Дондок ба Светлана Ирдынеевтэн хүртөө юм.

You have no rights to post comments