Уран зохёолой үдэшын хэмжээндэ Ц.Жамцараногой нэрэмжэтэ хизаарай номой сантай, Ж.Балданжабоной нэрэмжэтэ Агын Буряадай тойрогой уран зохёолой нэгэдэлтэй, Цыдып Жамбаловай гэр бүлэтэй хамта эмхидхэһэн уран шүлэгэй мүрысөөнэй дүнгүүд татагдаа.
   Дүнгүүдэй соносхогдохын урда тээ шүүгшэдэй түрүүлэгшэ, Агын Буряадай тойрогой уран зохёолой нэгэдэлэй хүтэлбэрилэгшэ Доржи Бадмаевта, шүүгшэд Батожаргал Гармажапов ба Дугарма Батоболотовада, Цыдып Жамбаловай хүүгэдтэ үгэ үгтөө. Тиин үринэрэйнь нэгэн, артист, дуушан, композитор, режиссёр Саян Жамбалов үгэ абахадаа: «Абымнай нэрэ мартангүй үргэжэ ябаһандатнай баярые хүргэнэбди. Хүн үри хүүгэдтээ алта мүнгэ, машина, гэр, мал гэхэ мэтэ эд зөөри үлөөхые оролдодог. Харин манай аба маанадтаа уран үгын баялиг, буряадай сэсэн үгын дээжые, захяа дамжуулһан шүлэгүүдээ үлөөһэн гэжэ досоогоо баяртай байдагбди. Алта мүнгэн олдоно ааб даа, машина хэзээшье абтадаг, харин иимэ баялиг олдошогүй гэжэ һанадагби», - гэжэ үнэ сэнтэй үгэнүүдые хэлээ. Тэрэ абынгаа ойн баярнуудта зорюулжа, 2016 ондо хэблүүлһэн «Хүхын дуунай һүни» номуудые шүлэгэй мүрысөөнэй лауреадуудта, 2021 ондо «нара хараһан» «Мүрысөөн» номуудые хабаадагшадта Улаан-Үдэһөө бэлэг болгон асарһан байна.
   Мүрысөөн тухай нэгэ хэды үгэ хэлэбэл, Цыдып Жамбаловичай түрэһөөр 95 жэлэй ойдо ба Оросой арадуудай нэгэдэлэй жэлдэ зорюулагдаад, буряад хэлэн дээрэ бэшэдэг зоной дунда эмхидхэгдээ. Тэрээндэ Үбэр Байгалай хизаарта ажаһуудаг ба хизаарһаа гарбалтай 30 авторнууд хабаадаһан байна. Тиин 35 хүрэтэр наһанай бүлэгтэ Шэтын эмнэлгын академиин оюутан Номина Ванзатова илажа, 1-дэхи шатын дипломоор шагнагдаа. Энэл академидэ һуража байһан Пурбо Лубсанов 2-дохи, Догойн Соёл Шойдоков ба Сахюуртын һурагша Светлана Балданова 3-дахи һууринуудые эзэлээ. Үбэр Аргалиин һурагша Чимита Дубжитова урмашуулгын шанда хүртэбэ. Харин 35-һаа дээшэ наһанай бүлэгтэ Амидхааша нютаг түлөөлһэн Долгорма Долгоржапова эрхим байһанаа гэршэлээ. Агын Роза Батомункуева Соёлма Шобогорова-Митыпова хоёр 2-дохи һуури хубааба. Шангай 3-дахи һуурида Ага-Хангилай Доржиханда Чирнинова ба Авдей һууринай Бабу-Доржи Дамдинов гэгшэд гараһан байна. Агын Цыремжит Батоева, Ешигма Жамбалова, Солбон Жамбалов гурбанда болон Хойто-Агын Балбарма Дашиевада урмашуулгын шангууд баруулагдаа. Бүлэг зон баярай бэшэгүүдтэ хүртөө бшуу.

You have no rights to post comments