Буряад Уласһаа, Эрхүүгэй можоһоо, Ага нютагһаа уран гоёор бэшэлгын оньһо һайн мэдэхэ болоһон каллиграфистнууд ажалнуудаа үзэсхэлэндэ дэлгээгээ.
   Эндэ 18-35 хүрэтэр наһанай хабаадагшад мүрысөө эхилээ. Тэдэ бэхэ ба саарһанай үнэр хангалтуулжа, хулинсагуудай бэшэдэг байһан хэлэн дээрэ шүүгшэдэй дурадхаһан шүлэгүүдые бэшэжэ эхилээ. Технологи ба интернедэй хүгжэжэ байһан сагта, сагай, али хүн түрэлтэнэй ажабайдалай түргэдэжэ байһан үедэ элинсэгүүдэй абажа ябаһан буряад-монгол бэшэг мүнөө сагта тодоржо байһаниинь һайшаалтай. Мүнөө жэлэй «Алтаргана» нааданда энэ мүрысөөнэй түрүүшынхеэ эмхидхэгдэһэниинь урматай.
   Хабаадагшадай ажалнуудые сэгнэхэ шүүгшэдтэй танилсуулбал, уран зураашадизайнер, буряад-монгол бэшэгээр уран гоёор найруулдаг мастер Янжима Батуева түрүүлэгшэнь байгаа. Саашань тоолоходо: Буряад Уласай «Титим арт» студиин багша Арюна Булгутова, Үбэр Байгалай хизаарай буряад хэлэнэй ба литературын багшанарай эблэлэй түрүүлэгшэ Цыцыгма Жанчипова, буряад-монгол бэшэгээр уран гоёор найруулдаг «Хараасгай» студиин Оксана Жербанова, монгол ба уран гоёор бэшэлгын «Бичиг соёл» түбэй захирал, монголой каллиграфиин уласхоорондын эблэлэй гэшүүн Эрдэнэбатын Анхбаяр, уран гоёор бэшэлгын мастер О.Одгэрэл, «QINGGELE» хитад каллиграфиин компаниин мэргэжэлтэн Сэнгэл гэгшэд.

You have no rights to post comments