Июлиин 15-да Ононой аймагай Новая Заря һууринда оршодог Тариин дуганай табан жэлэй ойн баяр ба Онон голой эрьеын «Намжил Шодон» гэһэн амгалан тайбанай субаргын рамнай һүр жабхалантайгаар үнгэрөө.
"Намжил Шодон" субарга.
Субаргын рамнай Онон голой урда бэедэ «Ага – Доодо Саһаша» гэһэн авто-унаагай харгыһаа холо бэшэ, «Звёздный» гэжэ хүүгэдэй элүүржүүлгын лагериин хажуудахи добо газарта үглөөнэй 9 сагһаа эхилээ юм. Һүүлээрнь Тариин дуганай ойн баярай хэмжээ ябуулганууд Новая Заря һууринда үргэлжэлөө бшуу. Энэ ехэ хэмжээ ябуулгада Забайкалиин хизаараар дид хамба Цырен лама, Агын дасанай шэрээтэ Бадма ламхай, Сүүгэлэй дасанай шэрээтэ Алдар ламхай болон үшөөшье олон дасангуудай шэрээтэнэр, түлөөлэгшэд хабаадаа. Удаань Новая Заря һууринай аман зохёолой «Сахюур» бүлгэмэйхид ирагуу һайхан дуунуудаараа сугларагшадые хужарлуулаа. Эсэстэнь эрын гурбан наадан эмхидхэгдэжэ, барилдаагаар абарга бүхэ Догой нютагай Батор Цыренжапов, һур харбалгаар абарга мэргэн Зүдхэлиин Баир Жаргалов болоо. Ехэ шанда Хара-Шэбэрэй Алтан Шагай гүйгөөшэ (эзэниинь - Эрдэни Норбосамбуев) хүртөө.
Дэлгэрэнгыгээр 29-дэхи дугаарта.