Николай Будашкинай нэрэмжэтэ арадай зэмсэгүүдэй оркестрнүүдэй ба ансамбльнуудай VI уласхоорондын конкурсдо агынхид амжалтатай хабаададаг заншалтай.
Энэ мүрысөөн ноябриин 1-4-дэ Шэтэ хотодо үнгэргэгдэжэ, Москва, Новосибирск, Улаан-Үдэ хотонуудһаа ерэһэн нэрэ түрэтэй жюриин гэшүүд хүгжэмшэдэй наада сэгнээ бшуу. Мэргэжэлтэдэй дунда үндэрөөр сэгнэгдэдэг мүрысөөндэ Сибириин ба Алас Дурна зүгэй эрхим оркестрнүүд ба ансамбльнууд, тэрэ тоодо Красноярскын, Хабаровскын, Примориин хизаарай, мүн Беларусь болон Хитад Уласуудай хүгжэмшэдэй бүлэгүүд хабаадажа, Агын хүүгэдэй уран урлалай һургуулиин арадай зэмсэгүүдэй оркестр (хүтэлбэрилэгшэнь - Баир Балдандашиев) 3-дахи шатын дипломой лауреадай нэрэ зэргэдэ хүртөө. Энэл һургуулиин иочин дээрэ наадагшадай ансамблиин 4 басагад – Ц.Цыбенова, Д.Цыренжапова, Ч.Будуева, Э.Содномова (хүтэлбэрилэгшэнь – Бутид Зангеева) ба буряад арадай зэмсэгүүдэй оркестрнүүдэй дунда Могойтын уран урлалай һургуулиин үхибүүд (хүтэлбэрилэгшэнь – Цыбикжаб Дашидондокова), Хүнхэрэй уран урлалай һургуулиин «Улаалзай» ансамблиин эдиршүүл (хүтэлбэрилэгшэнь – Оюна Пурбуева), Шэнэ Орловск тосхоной хүүгэдэй уран урлалай һургуулиин ород арадай зэмсэгүүдэй оркестр (хүтэлбэрилэгшэнь - Анатолий Афанасьев) 5-дахи шатын дипломуудаар шагнагдаа юм. Павликовскаягай нэрэмжэтэ Шэтын түбэй хүгжэмэй һургуулиин (ЦДМШ) арадай зэмсэгүүдэй оркестр дүрбэн үдэрэй туршада болоһон конкурсдо эрхимлэһэн байна.
