СССР-эй Верховно Зүблэлэй гурбан зарлалай депутат, Агын тойрогой гүйсэдхэхы хорооной түрүүлэгшэ ябаһан Бадма Цыреновэй дурасхаалда зорюулагдаһан барилдаагаар 17-дохи заншалта мүрысөөн Дулдарга һууринда үнгэргэгдөө.
Агын аймагай ударидагша Э.Базаров Дулдаргын И.Поповые илаба.
«Элеэ» тамирай байшан соо тойрогой гурбан аймагай эрхим барилдаашад танхимаар дүүрэн сугларһан зондо тамирай һайндэр бэлэглээ. Мүрысөөнэй нээлгэ урда жэлнүүдтэл адли үндэр хэмжээндэ эмхидхэгдээ. Залуу наһандаа хибэс дээрэ шиираг шамбайгаар барилдажа, нэрэ солотой болоһон ветеранууд мүрысөөндэ уригдаһан байна. Тус мүрысөөндэ 11 дахин оройлжо, дамжуулгын кубогта хүртэһэн Агын аймагай можо (ударидагшань – Элбэк Базаров), 5 дахин түрүүлһэн Могойтын можо (ударидагшань - Зорик Жамбалов), Дулдаргын аймагай можо (ударидагшань - Дамдин Тумуров) һубаряад хибэс дээрэ уригдаа. Мүрысөөнэй эмхидхэлэй хорооной түрүүлэгшэ, тойрогой Захиргаанай хүтэлбэрилэгшэ Бато Доржиев тамирай һайндэрөөр бултаниие амаршалаад, барилдаашадта амжалта хүсэһэн байна. 2016 ондо дамжуулгын кубогта хүртэһэн Агын аймагай можын ударидагша Элбэк Базаров кубогаа тушаагаад, гимн доро тугуудые бодхоогоо. Сенатор Баир Жамсуев, Гүрэнэй Дүүмын депутат Иосиф Кобзон гэгшэдэй зүгһөө амаршалгын телеграмманууд уншагдаа. Могойтын аймагай ДЮСШ-гай һоригшо, Россиин физическэ культурын ба тамирай габьяата хүдэлмэрилэгшэ Валерий Содбоевто 2017 ондо «Забайкалиин хизаарай дүрэ буляалдаата барилдаагаар эрхим һоригшо» гэһэн нэрэ зэргэ олгогдожо, сенаторнууд Баир Жамсуев Степан Жиряков хоёрой байгуулһан мүнгэн шан, кубок, баярай бэшэг барюулагдаа бшуу. Мэдээжэ һоригшо Валерий Содбоевой шабинар Эрдэм Борокшонов, Саян Жигзымаев гэгшэд тус тустаа 2016 ба 2017 онуудта эдир хүбүүдэй хоорондо барилдаагаар Сибириин федеральна тойрогой абарганууд болоһон, Россиин мүрысөөнэй шангуудта хүртэһэн байгаа. Тиихэдэ буряад арадаймнай бэлигтэй барилдаашад Балдан Цыжипов, Цыбик Максаров, Базар Базаргуруев гэгшэдтэ Агын тойрогой 80 жэлэй ойн медальнууд энгэртэнь зүүлгэгдээ. Забайкалиин хизаарай, Буряад ороной дүрэ буляалдаата барилдаанай хүгжэлтэдэ горитойхон хубитаяа оруулһан, Бадма Цыреновэй дурасхаалай мүрысөөндэ арба гаран жэлдэ ахамад судья ябаһан, СССР-эй тамирай мастер Владимир Балдановта медаль зүүлгэгдэһэн байна.
Дэлгэрэнгыгээр 47-дохи дугаарта
