Байгша оной ноябриин 30-ай үдэр Агын соёлой байшан соо Агын тойрогой 80 жэлэй ойн баярта ба Экологиин жэлдэ зорюулагдаһан «Лучший по профессии-2017» мүрысөөнэй дүнгүүд соносхогдоо.
Д.Жалсапова.
Тус мүрысөөн мэргэжэлэй шадабари дээшэлүүлхэ, соёлой ажаябуулгын оршом соо шэнэ үзэл бодолнуудые ба ажалай онол аргануудые сэгнэхэ гэһэн гол зорилгонуудтайгаар үнгэргэгдэбэ. «Жэлэй эрхим хэмжээ ябуулга» гэһэн түрүүшын шата байгша оной февраль һараһаа эхилжэ, табан һарын туршада социальна удха шанартай проектнүүд дурадхагдаа.
«Соёлой байшан уряална» 2-дохи шатада Агын аймагай нютагуудаар элдэб хэмжээ ябуулганууд эмхидхэгдээ, тэрэнэй дүнгүүдээр зузаан брошюра хэблэгдээ. Мүн «Соёлой эрхим эмхи-2017» гэһэн нэрэ зэргэдэ Орловскын соёлой байшан хүртэжэ, дипломоор, мүнгэн шангаар урмашуулагдаа.
«Мэргэжэлэй гимн» гэһэн гурбадахи шатада соёлой хүдэлмэрилэгшэдэй уран шадабариин мүрысөөн үргэн дэлисэтэйгээр үнгэрбэ. Уран шадабариин энэ мүрысөөндэ түрүү һуурида – Шулуутай нютагай уран һайханай хүтэлбэрилэгшэ Дулмажап Жалсапова, 2-дохидо – Шэнэ Орловск тосхоной соёлой, тамирай ба залуушуулай политикаар түбэй хүтэлбэрилэгшэ Юлия Бородина, 3-дахи һуурида Үбэр Аргалиин соёлой байшанай хүтэлбэрилэгшэ Галина Ринчинова гэгшэд гаража, мүнгэн шангуудта хүртөө.
