Агроном-садоводой мэргэжэлтэй болоо
   Агын аймагай Удаганта гэжэ газарта Жамсаранай Базарай бүлэдэ 5-дахи хүбүүн Боро түрэһэн байна. Эжынь гэнтын аюулаар наһа барахада, Дамдинай Добчиной һамган болоһон Пушембын Долгор дүү басаганиинь Борые үргэжэ абаад үндылгэһэн юм. Борые үргэжэ абаһан абань – гэбшэ лама Дамдинай Добчин Жамсаранай Базартай, түрэһэн абатайнь, 58-дахи статьягаар гэмнэгдэжэ, 1938 оной март һарада буудуулһан байна.
   Энэ үедэ Боро хүбүүн 4 наһатай, дүү хүбүүн Баирынь хоёртойхон байгаа. Энэ бүлын бүхы хүүгэд түрэл гаралдаа үгтэһэн.
   Энхэржэ, эрхэлүүлжэ үндылгэһэн уян сэдьхэлтэй эжыдээ Боро хүбүүн бүхэли наһаараа баяртай ябаа. Бага наһаниинь тэрэ үеын үхибүүдэйхидэ адлил байһан ааб даа. Талын мангираар, тибһээр үл хоолоо залгаха, үхэһэн малай арһа шанажа эдихэшье саг тудалдаһан. Үлэн хооһон байдалһаа бэень һуларжа, оронһоо бодохонь бэлэн бэшэ сагууд ушардаг һэн. Шуһата дайн эхилжэ, бүхы эдеэ хоол фронтдо эльгээгдэдэг байгаа ха юм. Эжынь үдэр һүнигүй фермэдэ хүдэлдэг, хүүгэд арга шадалаараа хамһалсадаг һэн. 1941 ондо долоон наһатайдаа Боро хүбүүн Аршаантын эхин шатын һургуули дүүргээ. Тэрэ үеын хүүгэд булта һураха, һуралсалаа үргэлжэлүүлхэ эрмэлзэлтэй байһан. Арга боломжонь хизаарлагданги байбашье, Урда-Агын 7 жэлэй һургуули амжалтатай дүүргээд, Агын дунда һургуулида ороо. Һурагша ябахадаа, тамираар бэеэ һоридог һэн, илангаяа хүнгэн атлетикээр. Элдэб хэмжээнэй мүрысөөнүүдтэ, тэрэнэй тоодо «Агинская правда» газетын эстафетэдэ илажа ябаа. Ниитын ажалда эдэбхитэй хабаададаг һэн, ангиингаа, һургуулиингаа комсорг байһан юм.

You have no rights to post comments