Тойрогой бүхы хүдөө һуурингуудта, тосхонгуудта ажаһуугшадай суглаанууд үнэргэгдэбэ.
Эдэ суглаанууд дээрэ толгойлогшонор захиргаануудайнгаа жэл соо хэһэн ажалаар тоосоно, бүгэдэ ажаһуугшадай хабаадалгатайгаар нютагай асуудалнууд зүбшэгдэнэ. Илангаяа түлеэ бэлдэлгын, зайгуул нохойнуудай олошоролгын, ТОС-уудай ажаябуулгын, интернедэй г.м. асуудалнууд бодхоогдобо.
Жэшээнь, Хүнхэртэ үнгэргэгдэһэн суглаанай үедэ нютагай захиргаанай ябуулһан ажал хэрэгүүд тухай слайднууд ходо харуулагдажа байгаа. Хэдэн слайднууд буряад хэлэнэй һарын хэмжээндэ эмхидхэгдэһэн конкурснууд тухай хөөрэнэ. Тэдэниие нютагай зүблэлэй депутадууд: Б.Гармажапова, Л.Мижитдоржиева, Д.Шойсоронова өөһэдын эдэбхи үүсхэлээр үнгэргөө бшуу.
Суглаануудта тойрогой болон аймагай засагай түлөөлэгшэд эдэбхитэйгээр хабаадабад.
Эдэ үдэрнүүдтэ аймагай хэмжээнэй тоосоото суглаанууд эхилхэнь. Харин январь һарада тойрогой Захиргаан ажаһуугшадайнгаа урда тоосохо юм.
