Гомбожаб Цыбиковэй нэрэмжэтэ Агын үндэһэтэнэй музей соо ноябриин 6-ай үдэр Цыренжаб Сокшигбоевич Соктоевой 80 жэлэй ойдо зорюулагдаһан дурасхаалта үдэшэ үнгэргэгдэбэ.
Тус хэмжээ ябуулга Агын Буряадай автономито тойрогой хүндэтэ эрхэтэн, Ажалай Улаан Тугай орденто Цыренжаб Сокшигбоевич Соктоев тухай үзэсхэлэн нээлгээр эхилээ. Хүндэтэ айлшадай дунда Россиин Федерациин Федеральна Суглаанай Федерациин Зүблэлэй гэшүүн Б.Б.Жамсуев, Агын тойрогой Захиргаанай хүтэлбэрилэгшэ Б.С.Доржиев, «Ага тосхон» хотын тойрогой болон аймагуудай захиргаануудай тойлгойлогшонор, Ц.Соктоевой түрэлхид хабаадаа. Хабаадагшад Ц.С.Соктоевой дурасхаалда дулаахан үгэнүүдые зорюулаа, наһанайнь намтар тухай баримтата фильм хараа. «Цыренжаб Сокшигбоевичтой 1991 он болотор суг хамта ажаллаһамди, ехэ болбосоронги ахатан байһан гээд нэн түрүүн тэмдэглэмээр. Энэнь хүн зоной дунда хүндэтэй, арад зонтоёо үгөө ойлголсожо шададагыень гэршэлнэ. Иимэ хэмжээ ябуулгын жэшээ болгон үнгэргэгдэһэниинь ехэ һайшаалтай. Ургажа ябаһан һургуулиин үхибүүдые, оюутадые Ага нютагаа холо ойро суурхуулһан, тойрогойнгоо хүгжэлтэдэ нилээдгүй хубитаяа оруулһан алдарта арад зонтоёо танилсуулха бидэнэй уялга, зорилго болоно», - гээд Б.Б.Жамсуев хэлэбэ.
