Баяр ёһололдо нютагай ажаһуугшад, хүндэтэ айлшад суглараа. «Энэ хүшөө бидэндэ, дурасхаалай газарболоно. Эндэ хүн бүхэн Эсэгын дайнда, һүүлээрнь амгалан байдалда наһа бараһан түрэлхидэйнгөө нэрэ олохо. Хүн зоной дурсажа байхада, тэрэнэй габьяа мартагадахагүй ха юм» , - гэжэ Үбэр Байгалай хизаарай хуули Байгуулгын Суглаанай депутат Сокто Мажиев тэмдэглээ.
Агын Буряадай тойрогой Инфраструктура хүгжөөлгын хүтэлбэриин дарга Тимур Батожапов саг соогоо шанартайгаар барилга дүүргэһэнэйнь түлөө «ХаргыСтрой» эмхиин директор Баир Бадмаевта баярые хүргөө.
Мемориальна комплекс «Формирование городской среды» программаар һэльбэн шэнэлэгдээ. Агууехэ Эсэгын дайнда Хара-Шэбэр нютагай 301 сэрэгшэд дайлалдаа, 170-иинь гэртээ бусаагүй, зарим солдадуудай хуби заяан эли бэшэ. «Алдар солын Аллей» 2 хубиһаа бүридэнэ: «Солдаты Победы» стеллэ ба илагша сэрэгшэдтэ зорюулһан Триумфальна аркаһаа. Энэ комплекс хэдэн жэлэй туршада зохёогдоо. Алдалан унаһан сэрэгшэдэй нэгэ хубинь 1980 ондо, харин «Скорбящая мать» скульптура Илалтын 45 жэлэй ойдо, 1990 ондо баригдаһан юм.
Митингын һүүлээр «Сад памяти» акциин хэмжээндэ залуушуул хасуури модо таряа.
Б.Мажиевай нэрэмжэтэ һургуулиин 197 һурагшадта һуралсалай шэнэ жэл баяр баясхалантай байба. Юуб гэхэдэ, сентябриин 11-дэ тамирай һургуулиин дэргэдэ шэнэ талмай нээгдээ. Энэ талмай «Спорт – норма жизни» гэһэн региональна түлэблэлэй хэмжээндэ баригдаа, 3 сая тухай түхэриг гаргашалагдаһан байна. Үмсын хэрэг эрхилэгшэ Бато Гончиков талмайн түлхюур дамжуулһанай удаа эдир тамиршадта бүмбэгэнүүдые бэлэглээ бшуу. Хара-Шэбэрэй һургуули үсөөн бэшэ талаан бэлигтэй тамиршадые хүмүүжүүлһэн. Дүрэ буляалдаата барилдаагаар Советскэ Союзай тамирай мастер Батоцырен Дашинамжилов, һур харбалгаар уласхоорондын классай тамирай мастер Булат Бадмаслов, хүндэ атлетикээр Россин Федерациин болон уласхоорондын классай тамирай мастер Руслан Аменов, сэрэгэй самбаар дэлхэйн чемпион Баясхалан Эрдынеев гэгшэд тоонто нютагаа холо ойро суурхуулһан юм.
Тамирай талмайн нээлгэ Хара-Шэбэрэй һурагшадай концерт-наадаар дүүрээ.
Хүүгэдэй наадаха шэнэ талмай Байкальская гудамжын үхибүүдтэ ёһотой бэлэг болоо. Тэрэ «Восточный» ТОС-ой болон нютагай захиргаанай, Могойтын аймагай ба Агын Захиргаанай, Үбэр Байгалай правительствын дэмжэлтээр, «Комплексное развитие сельских территорий» гэһэн гүрэнэй программын хэмжээндэ баригдаа. Талмай барилгада 1 614 257,17 түхэриг гаргашалагдаһан байна. Хүүгэдэй комплекс «АгаСтройЭм» подрядна эмхи байгуулаа.
