Тойрогой хүдөө ажахын мэргэжэлтэд 2017 оной һүүлшын зүблөөндѳѳ сугларжа, тоосоогоо хээ, гараад байһан шэнэ жэлэй түсэбүүдээ тодорхойлоо.

 

Бэлшээри саһан доро ороодүйл байна...

 

Малай үбэлжэлгэ хүндэхэн байдалда үнгэржэ байна. Олон ажахынуудта малай эдихэ хоол дуталдана, бэлшээри саһан доро ороно. Намартаа нөөсэлһэн малай хоолой 16 хуби тэжээл гаргашалагдаа. Малшадай урда янгинама хүйтэн үбэлэй, хабарай хара һалхитай һаранууд хүлеэгдэнэ. Зүблөө хүтэлһэн тойрогой Захиргаанай хүтэлбэрилэгшын орлогшо Буянто Батомункуевай хэлэһээр, январь һарада саһан үшөө ехээр орохоор хараалагдана. Агын аймагай захиргаанай хүдөө ажахын таһагые даагша Владимир Намжиловай мэдээсэһээр, декабриин 25-ай байдалаар, 4377 толгой эбэртэ бодо мал тоологдоно. Ажахынуудта тугалай субсиди тараагдана. Энэ жэлдэ 7 ажахы субсидида хүртэхэ юм. Хонин дээрэ «Гүнэй», «Һүдэнтэ», «Занта» ажахынуудта хоролто ажаглагдана. Аймагай захиргаанай толгойлогшо Жаргал Жапов хүдөө буусануудаар ябажа, малай үбэлжэлгэтэй танилсана, асуудалнуудые шиидхэнэ. Малшадай буусануудта зайн галаар хангалга муу гэжэ хэлэгдэнэ. Илангаяа «Хүнхэр» ажахын малшадта энэ асуудал хурсаар гарана. Гүнэй, Будалан нютагуудай дэбисхэр дээрэ зээрэнүүдэй зоргоороо бэлшэхэ ушарнууд гарана. Гүрэнэй хилэ дабажа гараһан амитад шүлхы үбшэ асаржа магад. Дулдаргын аймагаар малай үбэлжэлгын байдалтай хүдөө ажахын таһагые даагша Доржижаб Бадмаев танилсуулаа. Эбэртэ бодо мал, хонин, адуун һүрэг дээрэ гарза хоролтонууд бии. Малай үбэлжэлгөөр аймагай захиргаанда штаб байгуулагдаһан байна. Малай эдихэ хагда саһан доро ороодүй. Дулдаргын аймагайхид энэ намар хараалагдаһан түсэбэй 53 хуби тухай үбһэ нөөсэлһэн байна. Нютагһаа гадуур малай хоол бэлдэһэн «Родина», «Онон», «Балжана» ажахынууд үбһэеэ холо газарнуудһаа дууһан асараадүй. Хамта дээрээ 264 тонно малай хоол холын нютагуудай газар дээрэ бэлдээтэй байна. Могойтын аймагай захиргаанай хүдөө ажахын таһагые даагша Баир Дылгыровэй хэлэһээр, малай үбэлжэлгэ бараг хэмжээндэ үнгэржэ байна. Үбһэн бии, малай байра дулаан, уһаар хангаатай. Гансал хүдөөгэй арьяатанай малда добтолго эндэ тэндэ үзэгдэнэ. Зүблөөнэй үргэлжэлэлдэ эхэ хонидые үрэжүүлгын асуудалай дүнгүүд харагдаа. Шухала кампани эмхитэйгээр ябуулагдаа. Диилэнхи хуби хонид хэмэл аргаар үрэжүүлэгдээ, олон буусануудаар хусанууд табигдаа. Ерэхэ жэлэй мартын тэнгээр эхэ малай түрэлгэ эхилхэ болзортой.

 

You have no rights to post comments