Мартын 3-да Сахюуртада Агын аймагай хойто зүгэй һургуулинуудай хоорондо «Тоонто нютагаа магтанаб!» гэһэн зүжэглэмэл нааданай харалга-мүрысɵɵн үнгэргэгдɵɵ.
Һээр шаалга залуушуулай һонирхол татана.
Һурагшад нютаг нютагайнгаа түүхэ домог, суута хүнүүд тухай болоод нютагай уран зохёолшодой, хүгжэмшэдэй бүтээлнүүдые наадандаа үргэнɵɵр хэрэглээ. Сахюуртын дунда һургуулида хүмүүжүүлхы ажал буряад арадай ёһо заншал, һургаалнууд дээрэ үндэһэлэн табяатай. Тиимэһээ энэ һургуулиин дүй дүршэлыень хэрэглэн, «Сириус» гэжэ Агын аймагай хойто зүгэй һургуулинуудта классһаа гадуур түһɵɵ түсэб бэелүүлхээр хараалагдаһан байна.
Түрэл хэлэн дээрэ үнгэргэгдэһэн нааданай дүнгүүд иимэ байба. Түрүүшын һуури Урда-Агын һургуулиин эбтэй эетэй хүүгэд эзэлээ, 2-дохи һуурида - Сахюуртын һурагшад, 3-дахида хойто-агынхид гараа.
Һайндэрэй хоёрдохи хубида һээр шаалгаар мүрысɵɵн эмхидхэгдэжэ, 7 хүбүүд хаба шадалаа туршалсаа. Танхим Ага найман эсэгын тугуудаар шэмэглээтэй байба. Хүбүүд үндэһэн буряад дэгэлнүүдээ үмдэнхэй, намарһаа хойшо тьютор С.Ж.Чердоновой ударидалга доро бэеэ һоридог, бэлдэдэг байһанаа гэршэлжэ, 30 һээр һайн дүрэтэйгөөр хухалаа. Эсэстэнь 6-дахи ангиин Батор Болотов 1-дэхи һуури эзэлээ, 7-дохи ангиин Дабаа Цыдыпов 2-дохи болоо, 3-дахиие 8-дахи ангиин Зориг Дондоков ба 7-дохи ангиин Чингис Намдаков хубаагаа. Энэ хэмжээ ябуулгын гол зорилго хадаа түрэл хэлэеэ, нютагаа түүрээн магталга, дүтɵɵр танилсалга, нүхэсэлгэ байгаа. Зорилгоёо бэелүүлээбди.
