Февралиин 28-да «ДалиТЭ» театрай танхим соо Сагаан һарада зорюулагдаһан арадай уран һайханай олзобориин ба байдалда хэрэгтэй бүтээлнүүдэй үзэсхэлэн нээгдээ.

 

Д.Тукеевэй (Урда-Ага) бүтээл.

 

Агын тойрогой жараад уран гартан жюриин урда бүтээлнүүдээ дэлгээбэ.

Жюриин түрүүлэгшэ, Агын Буряадай тойрогой Захиргаанай соёлой ба тамирай таһагай дарга Б.Н.Бальжинимаев үзэсхэлэнэй нээлгэдэ сугларагшадые хани халуунаар амаршалаа. Үзэсхэлэндэ «Алтаргана» фестивалиин лауреадай ба дипломантын нэрэ зэргэнүүдтэ хүртэһэн бэлигтэй урашуулай болон дархашуулай бүтээлнүүд - хубсаһан, зурагууд, үндэһэн сувенирнүүд г.м. табигдаа.

Энэ үзэсхэлэн уран дархашуулда сэгнэшэгүй ехэ һургуули боложо үгэнэ, тэдэнэр бэе бэеынгээ ажалтай танилсаа, дүршэлөөрөө хубаалдаа. Уран урлалай эдэ бүтээлнүүд айхабтар наряар хэгдэнхэй, модоор, алта мүнгөөр дарха хэхэ, шабаха, оёхо гээшэ айхабтар ехэ оролдолгын ба тэсэбэриин хүсөөр бэелүүлэгдэдэг ажал гэжэ тэмдэглэхээр.

You have no rights to post comments