Шог зугаатай, энеэдэтэй үгүүлэлнүүдэй «Нютагай ябаган шог» гэһэн конкурсын дүнгүүдые согсолон, энэ асуудалда харюу үгэхѳѳр болзор тулажа ерэбэ.
«Толон» һонин уншагшад, энэ конкурсһоо үлэнгүй, ходо хабаададаг, түрүүшынхеэшье туршажа бэшэһэн зониие адагладаг һэн тула илагшадай нэрэ уншахаяа тон ехээр хүлеэдэг ёһотойт.
Хахад жэлэй туршада үргэлжэлһэн конкурсдо Шэтэ хотын, Ага тосхоной, Дулдарга, Тугшан, Зүдхэли, Догой, Хүнхэр, Согто-Хангил нютагуудай зон, мүн тиихэдэ Агын тойрогой гимназида һураһан залуушуул – дүн хамта 13 хүн хабаадаһан байна. Хэн нэгэниинь 1, зариманиинь 2-4-шье шогтой үгүүлэлнүүдые - юрэнхыдѳѳ 26 толилолго конкурсдо табиба. Зүгтѳѳ дүн татахадаа, хэн хэдые толилуулааб гэжэ харахын хажуугаар хэнэйнь үгүүлэл эгээл удхатай, энеэдэ хүргэмэ байгааб, хэниинь баян үгэтэйгѳѳр, уранаар бэшээб г.м. хараадаа абаһан байнабди. Хабаадагша бүхэнэй эльгээһэн ажал үндэрөөр сэгнэмээр, конкурсын эрилтэдэ хүрэмэ, тус газетэ захидаг хэдэн олон уншагшадай харааһаа алад гараагүй, сэдьхэлэйнь «утаһа» заабол дайраа байха.
Энэ удаа урмашуулгын шан Агын тойрогой гимнази түгэсхэһэн басагад - «Энэтнай манайда байха юм гү?» гэһэн шог зугаатай үгүүлэл бэшэһэн Арюна Бадмажапова ба Емельян Терентьевич абынгаа энеэдэтэй хѳѳрѳѳ найруулһан Аюна Далбаева хоёрто хүртэбэ. Шангай гурбадахи һуурида «Барбаа үбгэнэй хѳѳрѳѳнһѳѳ», «Гурбан ангуушад» гэһэн толилолгонуудай эзэн Вера Чимитова (Ага тосхон) гараба. «Толондо» үнинһѳѳ хойшо шүлэгүүдээ хэблүүлдэг Догойн Баяндалай Доржиевай «Хүйхэр Мухан-Дари» үгүүлэл баян буряад хэлээр бэшэгдэһэн байжа, хоёрдохи һуурида хүртѳѳ. Харин Согто-Хангилай Цырегма Дондокова «Ород хэлэниинь дуталдаа һэн», «Тархяа эрьеэд…», «Рубахам, рубахам», «Ипподром» гэһэн энеэдэтэй, шог зугаатай ушарнуудые зураглажа, илагша болон тодорбо.
Эдэ илагшадые, урмашуулгада хүртэгшэдые «Толон» һониной редакци соо апрелиин 8-да 13.30 сагта болохо шан барюулгын ёһололдо уринабди.
