Алхана нютагай Содбо Ешисамбуевай «Нангин эхэ байгаали» ном соо бэеэ, гэр байраяа арюудхадаг хангалнууд тухай уншахаар. Тэрэ толилолгыень болон «Буряад-ород толи» хэрэглэжэ, һайхан үнэртэй, хамаг муухай юумэнһээ сэбэрлэдэг уталгын зүйлнүүд тухай тэмдэглэл дурадханабди.

Адисаар утахада, хии бодос тэрьедэн арилдаг гэжэ тоологдодог. Христос шажанай зон ладан гэжэ бодосоор уталга хэдэг.

Хурьган арса хэршэжэ нюдөөд, ехэ амһарта соо хээд, хуралай боложо байха үедэ ламанарай урдуур баряад ябажа уншуулдаг, рамнайлуулдаг юм. Иигэжэ байра байдалаа арюудхажа сэбэрлэхэ адис табигдадаг.
Ая, ганга, ямаан арса, уула сэсэг (эдельвейс) хуһанай буурсаг, шэнэһэнэй шэлбэһэн, тэрэнгиин сэсэг гэхэ мэтэ ургамалнуудые тусхай сагта суглуулаад, нарагүй һүүдэр газарта хатаагаад үйрүүлдэг юм. Энэ хадаа урда сагта түбэд эмшэд-эрдэмтэдэй зохёоһон заабаряар бэлдэһэн зүйл юм. Санзайгаар утахада, хамаг муухай юумэн, тэрэ тоодо үбшэ тараадаг вирус, микробууд үгы хэгдэдэг.
Хүжэ хадаа хүбшэ тайгатай дээрэ газарта ургадаг элдэб арсануудые хэршээд, хатаагаад, ута гонзогороор даража хэһэн зүйл.

You have no rights to post comments