«Үбэр Байгалда социальна удха шанартай объектнүүдые Интернедтэ холбохо түһөө түсэб бэелүүлгэ хадаа гол шухала зорилго болоно. Хойто-Агын ба Шулуутайн һургуулинууд интернедтэ холбогдоходоо, Ород Уласай бүхы дэбисхэр дээрэ байһан мүнөө үеын һуралсалай нөөсэ ба арга боломжонуудые хэрэглэхэ аргатай болохо. Мүнөөдэрэй байдалаар, социальна удха шанартай 75 объект «ТрансТелеКом» компани интернедтэ холбоод байна. Бүхыдөө 371 объект, тэрэ тоодо 142 фельдшерско-акушерскэ пункт, 130 һургуули, МЧС-эй 27 часть болон нютагаа өөһэдөө хүтэлэлгын зургаануудай 72 объект холбогдохо юм», - гэжэ Үбэр Байгалай хизаарай хэлхеэ холбооной, энергетикын ба ЖКХ-гай сайдай орлогшо Евгений Самойлов хөөрэбэ.
Хүдөөгэй ажаһуугшадай хотынхидтал адли интернедтэ орохо эрхэ нүхэсэл байгуулха зорилго «О связи» гэһэн Федеральна хуули соо табигданхай. Энэ хуули соо 250-500 ажаһуугшадтай һуурингуудые секундын 10 Мбит-һаа бага бэшэ хурдантай интернедтэй болгохо тухай хубилалтануудые Президент В.Путин оруулһан байна.
Һануулбал, «Информационная инфраструктура» гэһэн федеральна түһөө түсэб «Цифровая экономика» гэһэн үндэһэн программын гол шэглэлнүүдэй нэгэн шуу. Гүрэнэй правительство Үбэр Байгалай хизаарай социальна удха шанартай 1159 объект 2,5 жэлэй туршада Интернедтэ холбохо ажаябуулгада нэгэ миллиард тухай түхэриг һомолхо юм.
