Сагаан-Уула нютагай, онгор хуасай угай Жаргал Рыгдылов 5 жэлэй саана сэрэгэй албанһаа табигдажа, нютагаа ерэһэн байгаа. Мүнөө хүдөө нютагайнгаа түймэр саралгын газарта ахалагша жолоошоноор хүдэлдэг. Түбшэн даруу зантай Жаргал хүбүүн уһан далай дээрэ алба хэһэн сагаа иигэжэ дурсаба: «Мүнөө 1 жэлэй туршада сэрэгэй албанда ябадаг болоо. Би Номгон далайн флодто тудахадаа, Владивосток хотодо 4 һарын туршада һуралсал гарааб. Тэрэ һургуули дүүргэхэдээ, хүбүүд элдэб тээшээ ошохол даа. Владивостогто һураһан уһан сэрэгшэд Хара далайн, Балтиин далайн, Хойто зүгэй г.м. ондоо флодто алба хэдэг. Ага тосхоной Алдар Цыреновтэй суг Владивосток ошоходомнай, бидэниие хоёр тээшэнь болгоо һэн. Алдар - далайн ябаган сэрэгтэ (морская пехота), би «Николай Вилков» гэһэн томо десантна корабль дээрэ радист-телеграфистаар абтаа һэнби. Тиихэдээ Морзе азбукаар холбоо байгуулдаг байгаабди. Би сэрэгэй корабль дээрэ 8 һара ябааб, сэрэгэй хэдэн ученинүүдтэ хабаадаа бэлэйб. Армида радистаар алба хэһэн абамни, Номгон далайн уһан сэрэгшэ ябаһан Жамсоев Юрий нагасамни жэшээ болоһон. Мүнөө Жапов Жаргал хуряахаймни, Сагаан-Уулын Баир Ангархаев гэгшэд уһан доогуур ябадаг онгосын сэрэгшэд юм».

Сэрэгэй алба контрактаар хэдэг Болот Бадмаевай хүүгэд наһан Догойн Татаар Харганаашада үнгэрөө. Нютагтаа нюргаар эгээл үндэр Жигжид абань наһаараа Догойн хамтын ажахыда жолоошоноор хүдэлһэн. Болот Жигжитович 2001-2003 онуудта Номгон далайн флодто «Маршал Шапошников» гэһэн противолодочно томо корабль дээрэ алба хэхэдээ, холо ойрын гүрэнүүдэй уһан далай дээрэ һайсал тамаржа, нүхэр ёһоной олон уулзалгануудта хабаадаа. Энэдхэг, Малайзи, Урда Солонгос г.м. олон гүрэнэй түб хото городуудые, элдэб крейсер, эсминец, фрегат гэхэ мэтые хараһан, хари гүрэнэй уһан сэрэгшэдтэй суг ученидэ нэгэтэ бэшэ хабаадаа бшуу. Тэрэ «За дальнее плавание» гэһэн тэмдэгээр шагнагдаа. 2014 онһоо Шэтэ хото шадар ябаган сэрэгэй частьда контрактаар алба хэнэ.

Тугшан нютагай Сэнгэ Мархаев «Адмирал Виноградов» гэһэн томо противолодочно корабль дээрэ алба гаража ябахадаа, Аденска далайн буланда (залив) сомалийска дээрмэшэдтэй буудалдажа, нефть шэрэжэ ябаһан «Московский университет» гэһэн танкер ба Россиин 23 эрхэтэдые сүлөөлэлсэһэн байна. Тэрэл нютагай Билигто Раднаев бурханай нэрээр нэршэһэн «Индра» гэжэ террористнуудтай тэмсэхэ ученидэ хабаадаһан. Тэдэнэр һаяхан нютагайнгаа уһан сэрэгшэ Баир Дулмажаповые золгон амаршалжа, бэлэг баряад ошоһон байна. Баир аха 40 гаран жэлэй саана Номгон далайн флодто алба хаахадаа, Севастопольhоо Владивосток хүрэтэр 6 hара 6 үдэр ябажа, 3 океан, 12 далай гаталжа, шэнэ корабльнуудые асаралсаhан. Тэрэнь сэрэгэй 4 онгосоһоо бүридэhэн эскадра байгаа. Тэрээнтэй суг ондоо корабль дээрэ Ага тосхоной Алексей Петров «Минск» гэһэн самолёт, вертолёт, ракетэнүүдые тээгээд ябадаг хүндэ крейсер дээрэ алба хэжэ ябаа. Б.Дулмажапов «Ташкент» гэһэн противолодочно кораблиин матрос-артиллеристээр ябаад, холын газарһаа ерэхэдээ, старшина зэргэтэй, артиллерийскэ расчёдой командир болоһон байна. Тугшанай хүбүүн Дарданеллы, Босфор, Гибралтар, Берингын проливуудые гаталһан, Африкые тойроод гарахадаа, Добрая Надежда хушуу (мыс) болон Командорско олтирогуудые, Энэдхэг, Филиппины, Солонгос г.м. гүрэнүүдые хараһан ёһотойл уһан сэрэгшэ юм.

You have no rights to post comments