Суранзан Ральдин Ага тосхондо түрэһэн. Агын тойрогой гимназида һуража байхадаа, һуралсалай болон ниитэ ажабайдалда эдэбхитэйгээр хабаа-дажа ябаһан. Һурагша физикэ, математика предмедүүдээр абьяастай байһан. Тиимэһээ Догойн дунда һургуулиин дэргэдэхи физикэ ба математикын суута һургуулиин курснуудта ябаһан, хүбүүндэ тэрэ үе саг жэгтэй һайханаар хадуугдаһан байна. 2002 ондо гимнази дүүргээд, Томскын гүрэнэй хүтэлбэриин болон радио-электроникын системэнүүдэй университедтэ орожо, «инженер» мэргэжэлтэй түгэсхөө бэлэй.
Суранзан Владимирович ажалайнгаа намтар Агада налог татабариин инспекциин аналитическа таһагта 2011 оной март һарада эхилһэн юм. Тус таһагта 9 жэл хүдэлөө. Ажалай талаар хүгжөөшье, харюусалгатай, шадабаритай болоһон хүдэлмэрилэгшэ һүүлшын 3 жэлэй туршада бүридхэлэй болон татабари түлэгшэдтэй ажалай таһагай даргын орлогшоор ажаллажа байна. «Ажалнай гэхэдэ, ажаһуугшадта гүрэнэй туһа шанартайгаар хүргэлгэ болоно. Ажаһуугшадта налог татабариин асуудалнуудаар мэдээсэхэ, ойлгуулха болон туһалха, зүбшэл, заабари үгэхэ гээшэ таһагаймнай гол зорилго юм. Манай структура шэнэ технологическа һанал бодол (идея) бодото дээрэнь бэелүүлгээр Россиин тон түрүү албан мүн.

Мүнөө COVID-19 үбшэнэй дэлгэрээд байхада, олзын хэрэг эрхилэлгэ, эрхэтэд гайда ороод байна. Тиихэдэнь гүрэн тэдээндэ дэмжэлтэ үзүүлнэ, шухалань гэхэдэ, энэ туһань тэрэ дары хүрэнэ. Бидэ, гүйсэдхэгшэд, албамнай 5, 10 жэлэй саана ямар байһан бэ гэжэ мэдэнэбди. Тиихэ үедэ тойрогоймнай бага олзын хэрэг эрхилэлгэдэ адресна туһа хүргэхэнь нилээд хүндэ байһан. Технологическа талаар таһалгаряагүй ажаллаха, хүн зондо туһалха аргатай байһандаа ехэ урматайб, - гэжэ Суранзан Владимирович тэмдэглэнэ.

«Жэл бүри «Инспектор года» гэһэн Үбэр Байгалай хизаарай хэмжээнэй зохёохы конкурс үнгэргэгдэдэг. Тэндэ зохёохы бэлигтэй, шударгы бэрхэ хүдэлмэрилэгшэд хабаададаг юм. Суранзан Владимирович 2012 онһоо суг хүдэлдэг нүхэдтэеэ конкурсдо хабаадажа байдаг. Зоригма нүхэрынь баһал татабариин инспекторээр хүдэлдэг, мүнөө басагантаяа декретнэ амаралтада һууна», - гэжэ суг хүдэлдэг Батоев Владимир нүхэрынь хөөрэнэ.

You have no rights to post comments