Хэдэн жэлэй туршада Агын Буряадай тойрогой ниитын эмхинүүдэй гэшүүд наһаа хүсөөгүй хүүгэдые һурган хүмүүжүүлнэ бшуу. Декабриин 2-то Агын Буряадай тойрогой Захиргаанай үүсхэлээр Ага тосхоной К.И.Базарсадаевай нэрэмжэтэ хүүгэдэй уран урлалай һургуулида тойрогой ниитын эрхим хүмүүжүүлэгшэдые элирүүлгын түрүүшын конкурс эмхидхэгдээ.
2011 оной декабриин 14-дэ Забайкалиин хизаарай Хуули байгуулгын Суглаан ниитын хүмүүжүүлэгшэд тухай хуули абтаһан байна. Тэрэнэй ёһоор эдэ хүмүүжүүлэгшэд социальна талаар аюултай гү, али хүндэ хүшэр байдалда ороһон наһаа хүсөөгүй хүүгэдые хараха, бэеын, оюун ухаанай, сэдьхэлэй талаар хүмүүжүүлхэ уялгатай. Хүүгэдтэ бэрхэшээлтэ сагтай тохёолдобол, зүб харгы руу заладаг, зүбшэлнүүдые үгэдэг хүнүүд юм. Тус конкурсдо тойрогой ниитын юһэн хүмүүжүүлэгшэд хабаадаа.
М. Эрдынеев хэһэн ажал тухайгаа хѳѳрэбэ. Н. Дымова сугларагшадта дуугаа бэлэглээ.
Эдэ бол Новоорловск тосхоной захиргаанай мэргэжэлтэн Л.И.Толкачёва, Дулдарга һууринай захиргаанай толгойлогшо М.Б.Эрдынеев, Дулдаргын аймагай захиргаанай социальна политикын хорооной харгалзалгын, тэдхэн хүмүүжүүлгын мэргэжэлтэн А.А.Потехина, Могойтын 2-дохи дунда һургуулиин химиин багша Е.В.Куликова, Могойтын 1-дэхи дунда һургуулиин ород хэлэнэй ба литературын багша Д.Д.Дылыкова, Нуринск нютагай захиргаанай толгойлогшо И.В.Филиппов, Агын хүүгэдэй зохёохы шадабариин байшанай нэмэлтэ һуралсалай багша Б.Ц.Баясхаланова, Агын аймагай сүүдэй дэргэдэхи «Орловский» гэһэн ажаһуугшадые социальна хангалгын хамтадхамал түбэй эдиршүүлэй багша-психолог Д.Ц.Барадиева, Ага тосхоной дүүмын депутат, үмсын хэрэг эрхилэгшэ Н.О.Дымова болоно.
Жээрэб татаһан хабаадагшад слайднуудые, видеоролигуудые хэрэглэн, өөртэеэ, ниитын хүмүүжүүлэгшын ажалтаяа танилсуулаа, хоёрдохи шатада хобби тухайгаа хөөрөө. Жэшээнь, тэдэ дуу дуулаха, хатарха, элдэб эдеэ шанаха, ном уншаха, нэхэжэ оёхо, хүнүүдые хүхеэхэ дуратай байна. Һүүлээрнь хүндэ хүшэр ушартай тохёолдобол, яахаб гэжэ асуудалда харюусаба.
Жюриин гэшүүдтэ һууринуудые гаргахада, ехэ хүндэ байгаа: эдэ юһэн ниитын хүмүүжүүлэгшэд булта эрхимэй нэрэ зэргэдэ хүртэхөөр, ажаябуулгань сэгнэшэгүй. Тиигэбэшье дүнгүүд гаргагдажа, баярай бэшэгүүдээр И.В.Филиппов, А.А.Потехина урмашуулагдаһан байна. Гурбадахи һуурида Е.В.Куликова, Д.Д.Дылыкова ба Д.Ц.Барадиева гараа. Хоёрдохи һууриин дипломуудта Б.Ц.Баясхаланова, Л.И.Толкачёва хүртөө юм. М.Б.Эрдынеев ба Н.О.Дымова тус конкурсын илагшад болоһон байна. Тойрогой Захиргаанай социальна хүгжэлтын таһагай дарга Б.Б.Тарбаева тойрогой захиргаанай зүгһөө ниитын хүмүүжүүлэгшэдые амаршалаад, энэ буянта хэрэгыень дэмжэжэ ябахабди гэжэ хэлээ.
Дэлгэрэнгыгээр 49-дэхи дугаарта.
