Мүнѳѳнэй компьютерна технологиин үедэ ажаһууһан зон зайн галһаа бүришье дулдыдадаг гээшэбди. Айл бүхэндэ зайн галай байхын тула тусхай мэргэжэлтэд ажалаа үдэр һүнигүй ябуулжа байдаг. Тэдэнэй нэгэн «Читаэнерго» хэлхеэ холбооной албанай филиал болохо Дулдаргын ЮЗЭС-тэ хүдэлдэг Цындыма Дашидондоковна Цырэнэйтэй хѳѳрэлдѳѳ эмхидхэһэн байнабди.
- Цындыма Дашидондоковна, Энергетигүүдэй мэргэжэлтэ һайндэр дүтэлбэ. Юундэ энэ мэргэжэл шудалха гэжэ шиидэһэмта?
- Минии тоонто нютаг Ага тосхон юм. Агын 1-дэхи дунда һургуулида 10-дахи ангида һуража ябахадамнай, Улаан-Үдын электротехникумэй багша ерэжэ, маанадта һургуули тухайгаа хѳѳрѳѳ, идхалгын ажал ябуулаа һэн. Тиигэжэ 1988 ондо Улаан-Үдын хэлхеэ холбооной электротехникумэй “Автоматизированная электрическая связь” гэһэн таһаг “Техник элестросвязи” мэргэжэлтэйгээр дүүргээб.
- Ажалайнгаа намтар хаана эхилһэмта?
- Техникумэй үнэмшэлгэтэй боломсоороо, Шэтын телефонно станцида электромеханигаар эльгээгдээ бэлэйб. Тэндэ удааншье хүдэлѳѳгүйб. 1990 ондо Дулдаргын ЮЗЭС-тэ хэлхеэ холбооной инженер гэһэн тушаалда хүдэлжэ эхилээ һэнби.
- Дүн хамта хэды жэл хүдэлжэ байнабта?
- Хорин зургаан жэл.
- Мүнѳѳ ямар тушаалтайбта?
- Ахамад инженерби.
- Ажал тухайгаа хѳѳрѳѳд үгыт.
- Албанай диспетчернүүд 6 аймагай, 23 подстанциин дежурна бригадануудтай харилсаатай байхынь түлѳѳ высоковольтно, телефоной, сотово, радиогой утаһануудые үдэр һүнигүй холбоотой байлгаха гээшэ манай гол зорилго. Ямаршье усалгүйгѳѳр бүхы 6: Дулдаргын, Акшаагай, Хэрын, Агын, Могойтын, Харымай аймагуудые зайн галтай байлгаха ёһотойбди.
- Дулдаргын ЮЗЭС-эй хэлхеэ холбооной коллектив хэды мэргэжэлтэдһээ бүридэнэ гээшэб?
- Мүнѳѳ Дулдаргын ЮЗЭС-тэ 6 мэргэжэлтэд хүдэлнэ. Даргатаяа хоюулаа хүдэлхэ сагуудшье болоһон.
Дэлгэрэнгыгээр 51-дэхи дугаарта.
