Цыбик Доржинимаевич абатаяа тус кооператив 2016 ондо нээһэн байна. Түрүүн 3 сая тухай түхэригэй грант шүүжэ, һүнэй зүйлнүүдые буйлуулдаг цех нээгээ бшуу. Кооперативта 58 хүн гэшүүн боложо оронхой. Диилэнхи хубинь фермернүүд болоно. Даашадань 54 толгой эбэртэ бодо мал, тэрэ тоодо 33 үнеэн үсхэбэрилэгдэнэ. Малынь симментал үүлтэрэй, һү ехэтэй. Үнеэ һаадаг оньһожоруулагдамал техникэтэй. Һүеэ ээзгэй, зөөхэй болгожо буйлуулдаг. Үнгэрэгшэ жэл Ц.Балбаровай ударидадаг ажахыда үрэжэлтэй байгаа. Малай эдихэ үбһэ ногоон һайнаар ургаа, мал тобир тарганаар ондо ороо. 2019 ондо хизаарай СПК-нуудай хоорондо конкурсдо түрүүшын һуурида гараһан байна. Жэлэй туршада 9 тонно мяха, 80 тонно һү буйлуулжа наймаалаа. Үйлэдбэриеэ наймаалжа, 2,5 сая түхэригэй олзо олоо. Энэ хадаа урда жэлһээ эрхим дүн болоно бшуу. Үнеэдээ түрүүлжэ, һайн түл абадаг. Зуун үнеэнһээ дунда зэргээр наян тугал абаһан байна. Малаа һайнаар ондо оруулхын тула 20 тонно үбһэ тэжээл нөөсэлдэг. Хажуугаарнь турнепс, зелёнко бэлдэдэг шуу.
Яна нүхэртэеэ кооперативай ажал ябуулхын хажуугаар Ага тосхон дээрэ кафе, урда бэедэ мяханай зүйлнүүдые, огородой ургамалнуудые худалдадаг наймаа ударидана. Мүн Агын голой эрьедэ оршодог Хүйтэнэй Адаг гэжэ газарта таряашанай-фермерскэ ажахы даадаг. Тэрэ ажахые Доржинима абань 1992 ондо байгуулһан юм. Тэндэ хартаабха, хапууста ба бусад огородой эдеэ таридаг. Мүн тосхоной ажаһуугшад тэндэнь хартаабха һуулгадаг. Цыбик Балбаров ажалаа урагшатайгаар ябуулжа, олон хэмжээ ябуулгануудта спонсорско туһаламжа үзүүлдэг гээшэ.
